Chennai: Meghalaya-oni sak 29 doctorrangni chu·sokaniko mande ra·na gita Meghalaya aro Tamil Nadu sorkari bakrime Kasturba Gandhi Hospital, Chennai-o valedictory ceremony-ko ong·atangaha. Comprehensive Emergency Obstetrics Care (CEmOC), Ultrasonography, Life Saving Anaesthetic Skills-o ong·atgipa jadokni specialize trainingo bak ra·enba ia medical officer-rang chu·soktokaha. Dolgni a·dok sorkarirang healthcare-ko namdapatna miksonganio ja·ku de·na Memorandum of Understanding-ko soi ka·grikanio ia traning programko ong·ataha.
Tom·anio Tamil Nadu-ni Health Minister Thiru Ma Subramanian, Meghalaya-ni Health Minister Dr. M Ampareen Lyngdoh aro chugipa gadango donge kam ka·gipa official-rang bak ra·angtokaha.
Tom·anio bakko ra·e aganprakataon, Dr. Ampareen Lyngdoh, dolgni a·dokrangni meligrike kam ka·na ja·ku de·ani gimin aganangaha.
Tamil Nadu aro Meghalaya dolgnian a·doktango aro a·song gimikoni healthcare-ko namdapatna miksonga. Tamil Nadu aro Meghalaya-ni bakrimania apsan ong·e re·mikkangani chinko mesoka baksana a·songni healthcare-ko bilakatna ja·ku de·aniko mesoka.
Mija bilsi 2022 September jao Meghalaya aro Tamil Nadu, meligrike kam ka·na Memorandum of Understanding-ko soi ka·grikaha.
