Skul, college-rango digital awareness-ko ong·atchina MSCW didianga

Shillong: Skul, college-rango digital awareness-ko ong·atchina, Meghalaya State Commission for Women (MSWC)-ni member, Felicita Majaw, sorkariko didiangaha.
New Delhi-o National Commission for Women (NCW)-ni gita Cyber Safety aro Digital Empowerment-ni bidingo tom·aniko ong·atao legal membor Deity Majaw baksa Felicita Majaw dongangpaha.
Iarangni bidingo NCW baksa salgro salaram a·dokrangni dingtang dingtang a·dokrangoni women commission-ni watata man·gipa baksa MSCW-ni membor-rangming agangrikanirangko dakangaha.
India-o data privacy bill-ko ra·bani bidingo dabianiko dakangna iano nangenga ine Sukrobar salo The Shillong Times-na MSCW-ni membor aganangaha.
Dambegipa bi·sarang, dal·drobaenggipa aro chadambe gisik sokdokugijagiparangko dingtang dingtang app-rangoniko champengna nangenga. Bi·sarangni digital bosturangko jakkalanio ma·a-paarang namen simsakna nanga aro somoi gita jakkalna on·na nanga.
Golmal ong·atna man·anirangko sakki man·engaonin aro songsalrangko bak dakatani jeon kenbegni ong·enga indakgipa tol·gipa koborrangko aro ong·gija kobor on·sretanirangko maidake nirokangna a·dok sorkari nangchongmotgipa ja·kurangko ga·angna nanga, ine ua aganangaha.
A·gilsak gimiko Artificial Intelligence (AI)-ni tang·dogipa baksa re·mikkangengaha aro social media ge·antion chadamberangni gispeo mingsingbatgiparang jekai WhatsApp, Instagram aro Facebook ong·enga, ine MSWC member aganangaha.
A·songo songdonggipa sakantian entertainment-ba ong·chong, sokachakanioba ong·chong, tourism, ugita dakgiparang aro politics aro international bakrimanirangoba ong·chong iarang pilakon technology-o ning·tue an·ching nangdimaniko man·a ine ua aganangaha.
“Da·ode sing·ani ong·engaha, an·ching maidake an·tangtangko indakgiparangoni  chel·e rakkina man·gen aro ia cyber space network-o a·gilsak gimikna maidake niamrangko tariangna man·gen. An·chingni a·dokko man·chape a·songo cyber crime-rang aro chadrapani baririkrikan baksa ia subject bil gnanggipa ong·enga,” ine Majaw aganangaha.
Dingtangmancha me·chikrangni kosako jekai cyber-o chonikna, namgija dakna senge donga, tangka ra·sekna, tangka cha·bokna, mande badingsrukna, ugita dingtang dingtang sikanirang donga, indakgipa cyber crime ong·arangni bidingo NCW gisiko nangbate janapangaha, ine ua agandapangaha.