M’laya-oni JJM, Amrit Sarovar-ni beneficiaries-ko I-Day maniaona okama

SHILLONG: Ia bilsini Independence Day-o New Delhi Red Fort-o maniaona Meghalaya-oni adita sak dingtang dingtang central govt scheme-ni beneficiary-rang Special Guest ong·e bakko ra·na sokanggen.  A·songni dingtang dingtang bakrangoni sak 1700 manderang 15 August Independence Day-ko maniao bakko ra·gen. Dingtang dingtang flagship programrang jekai- Jal Jeevan Misison (JJM), PM Kisan Samman Nidhi Yojna, Amrit Sarovar Yojna, Central Vista project ba uandakgiparangoni beneficiary-rang bakko ra·anggen.
Meghalaya-oni sakgittam JJM beneficiary-rangko New Delhi-ona I-Day maniao bakko ra·echina okamataha. JJM, Meghalaya a·dokni manderangni janggi tanganio namen dingtanganiko ra·baaha. East Khasi Hills, Mawkynrew-oni Smt Gloria Umsong, Shri Jenesiuis Marwein, Ri bhoi district, Mawphrew-oni Miss Babiangmon Lapang- uamang Meghalaya-oni New Delhi-ona re·anggen.
Delhi-o I-Day-ko maniaona bakko ra·na okamataniko man·aniara namen rasongni ong·a. JJM, a·songna dal·bea dingtanganiko ra·baaha, mongsongbate me·chikrangna namgniko ra·baaha, bang·a songrangona chi pipe sokaha, da·ode manderang chi kona chel·e re·na nangjaha, noktangon man·aijok ine Smt Gloria Umsong, aganaha.
JJM-ni sakgipin beneficiary Shri Jenesiuis Marwein, I-Day maniao bak ra·na kusi ong·ako parakataha. Ua bilsi 2020-on JJM-ni gita water connection ba chi pipe sale on·ako man·e, chiringona chel·e re·e chi kona nangjaha ine aganaha. Aro Prime Minister-ko iana mittelataha.
Ri Bhoi district-oni Miss Babiangmon Lapang, jean game cha·gipa ong·a, kobor ra·timgiparang baksa agangrikmitingo New Delhi-ona re·ange maniao bak ra·e  mikrontangchi nikna cholko man·gen ine kusi ong·ako parakaha. JJM sokbana skangni salrangko gisik ra·aton, ‘skangode chinga chi kona ong·kataon noksulrang baksa kajia ong·rongachim. Indiba bilsi 2022-oniko noktangona chi pipe-ko man·e maming kajia golmal dongjajok ine Miss Lapang aganaha.
Apsan daken Amrit Sarovar -ni beneficiary-rang- East Jaintia Hills-oni Merisuklin Syngkon, East Garo Hills-oniko Shri Meduwin Marak aro Smt Delpinna Sangma- uamangkoba New Delhi-ona Independence Day-ko maniao bak ra·echina okamaha.
East Garo Hills Rongjeng songoni Shri Meduwin Marak, New Delhi-ona re·ange I-Day maniao bak ra·na cholko man·anina rasong chanikako parakataha. Aro ua Prime Minister Narendra Modi-ni Red Fort-o aganprakako LIVE knana kusi ong·soenga. Uandake Amrit Sarovar, uni janggi tanganio dal·bea dingtanganiko ra·baaha ine Meduwin aganaha. Meduwin Marak aro Delpinna Sangma- mang sakgnian East Garo Hills-oniko na·tok jilgiparang ong·a.
Independence Day maniaona bakko ra·na sokanggipa special guest-rang, National War Memorial aro Pradhan Mantri Sangrahalya (Prime Ministers Museum)-ko nibajolna cholko man·gen.