SHILLONG: Meghalaya a·doko sorkari kamrangko pilaknande tikate on·na man·jawani gimin a·dok sorkari, chadamberangna bading chiwalanirangoba janggi tangani cholrangko on·skana cholrangko nienga ine Budbar salo, a·dokni Chief Minister Conrad K Sangma parakataha.
Budbar salo, NEHU Shillong campus-ni ong·atanggipa Rozgar Mela-o jinmana aganprakangengon, kam ka·e cha·ani cholrangko on·anio ra·bianirangko chagrongna nangengani gimin sorkari, dingtang dingtang cholrangkoba niskaenga ine Chief Minister parakataha.
Sorkari kamrangko bilsio sak 1200-1500-na bate on·na man·jaenga ine an·tangni suk ong·gijaniko parakatengon, a·dokni chadamberangna janggi tangani cholrangko on·na gita sorkari, dingtang dingtang cholrangkoba sandienga aro ia cholrangoni mingsade bading chiwale cha·ani cholba ong·enga ine Sangma aganaha.
A·dokni chadamberangna janggi tangani cholrangko on·na gita nambatgipa cholde dingtang dingtang kamrango cholrangko sandianian ong·enga ineba Chief Minister parakataha.
Kamrangko ka·e cha·na gita kam changani aro ku·sik aganna man·aniko nangchongmota ine janapatengon, China, Japan, Germany, UK aro Australia a·song gita dakgipa biaprangona kam ka·giparangko watatna cholrangko nienggipani gimin Chief Minister aganangaha.
Iandakgipa cholrangko on·na gita chadamberangna ku·sikrangko skie on·na aro kamrangni gimin skie on·na gita sorkari kam ka·enga ineba Chief Minister parakataha.
