A·songni chang 77-gipa Jakgitelani Salko Garo Hills-oba tom·tome manianga

TURA: A·songni gipin biaprango gitan chang 77-gipa Jakgitelani Salko re·anggipa August-ni 15 tariko, Garo Hills-oba tom·tombee aro katchabee maniangtokaha.
Tura-o ia salko New Tura-ni Matchakolgre Govt LP skul kal·chakramo maniangaha aro ia salko manianio Meghalaya Legislative Assembly-ni Speaker Thomas A Sangma, mongsonggipa sokgipa ong·e, a·songni nisanko badalate on·angaha.
Ia manianio gimik dol 21 contingent-rang March Past ka·anio bak ra·angaha aro ia dolrangara, 2nd MLP Battalion, Tura DEF, Tura Govt College, Don Bosco College, Don Bosco Higher Secondary School aro Pechon Memorial School-ni NCC-rang baksana St. Mary’s Higher Secondary School, Don Bosco Higher Secondary School, St. Xaviers Higher Secondary School, Christian Girls Higher Secondary School, Garo Union Higher Secondary School aro Government Girls Higher Secondary School-ni Scouts & Guides-rang ong·a.
A·songni chang 77-gipa jakgitelani salko manianio Meghalaya Legislative Assembly-ni Speaker, jinmana aganprakangengon, British-rangni sasononiko jakgitel ong·atna gita an·tangtangko on·kange kam ka·anggipa pagitcham ma·gitchamrangko mittelpilangaha.
Jakgitelaniko man·ani ja·man a·songni chu·sokatgipa kamrangni gimin janapangengon, a·songo namroro silroroaniko ra·baanio G8 summit-ni kamrangni gimin manderangna talate on·angenba, iandakgipa gadango bak ra·pana man·aniara a·songna mikkim rasongni ong·a ine Sangma parakataha.
Meghalaya sorkarini chu·sokatgipa kamrangni gimin janapangskaengon, sak 1100 chadamberangna sorkari, cholrangko bikote on·na man·aha aro ia chadamberang da·o a·dokni dingtang dingtang a·barango kamrangko ka·engaha ine Sangma parakataha.
Kamrangko ka·e cha·na gita cholrangko ong·katate on·ani bidingo janapangkuengon, Shillong Technology Park-ko matchotahaode sak 1500 chadamberangna kamrang nakatdapgnok ine Assembly Speaker parakataha.
Assam aro Meghalaya a·dokni simarango golmal ong·anirangko nikna man·rongengani gimin janapangskaengon, ia meligrikgijanirangko namatna gitasa Assam aro Meghalaya sorkarirang MoU-o soi ka·grikaha ine Sangma parakataha.
Bangladesh a·songni jakgitelanina dakgrikanio an·tangtangko on·kange dakgrikgipa Meghalaya a·dokni matgrikrangko gisik ra·na gita Dhaka-o U Tirot Sing Memorial-ko rikenga ineba ia tom·anio Assembly Speaker parakataha.
Ia salko manianio Assembly Speaker-ni jakchi, nambatgipa health centre-rangna, NGO-rangna aro sorkario kam ka·giparangnaba dingtangmancha appreciation award-rangko on·angaha.
Iani ja·man Assembly Speaker, Western Range-ni DIG aro West Garo Hills SP baksa march past ka·anio nambatgipa dolrangna boksisrangko on·angaha. NCC-rangni March past ka·anio skanggipa boksisko Tura Govt College boys, gnigipako Don Bosco College boys aro gittamgipa boksisko Pechon Memorial School boys man·aha. Scouts aro Guides-rangni march past ka·anio skanggipa boksisko St Mary’s Higher Secondary School, gnigipako Christian Girls HS School aro gittamgipa boksisko St Xaviers Secondary School man·angskaaha.
Iani ja·man Tura-o dingtangmancha bi·sarangna kal·susaani aro Maharirangni budu salgrikanikoba Sports department-ni gita ong·atangaha.
Jengjal Civil Sub-Division-o a·songni chang 77-gipa jakgitelani salko manianio Salmanpara-ni MLA Ian Botham K Sangma, mongsonggipa sokgipa ong·e bak ra·angskaaha aro a·songni nisanko badale on·angenba dolchet contingent-rangni parade ka·aniko salam ka·angaha.
Indake ong·engon, North Garo Hills a·jani headquarter Resubelpara-o a·songni chang 77-gipa jakgitelani salko manianio a·dokni Water Resources Minister Comingone Ymbon, mongsonggipa sokgipa ong·e bakko ra·angenba, a·songni nisanko badalate on·angskaaha.
Ia manianio dol 25 contigent-rang march past ka·anio bak ra·angaha aro ia dolrangara, Meghalaya Police-ni Battalion, Mendipathar College-ni NCC aro dingtang dingtang skulni Scouts & Guides-rang ong·a.
Parade dolrangko UBSI Priyanka K Marak aro Second Commander UBSI Sengwat R Marak dilangaha. March past ka·anio skanggipa boksisko St Thomas Higher Secondary School Boys, gnigipa Paschal Secondary School boys aro gittamgipa boksisko Paschal Secondary School girls cheangaha.
North Garo Hills a·jao ia salko manianio CHC, PHC aro sub-centre-rangnaba Kayakalp Award-rangko on·angaha aro award-ko man·giparangara, Resubelpara CHC, Bajengdoba PHC, Gabil PHC, Wageasi PHC aro Chibongga sub-centre ong·a.
Ia salko maniani bak gita dingtang dingtang kal·susaanirango chegiparangnaba boksisrangko on·angaha.
Ja·mano bi·sarangna kal·susaanirangkoba ong·atangaha aro Resubelpara CHC-o sae donenggipa manderangnaba cha·anirangko suale on·angaha.
Garo Hills-ni gipin biaprango gitan a·songni chang 77-gipa jakgitelani salko South West Garo Hills a·jaoba maniangaha aro ia salko Ampati baksana pilak dambri C&RD Block-rangoba maniangaha.
Ampati-o ia salko manianio a·dokni Power Minister AT Mondal, mongsonggipa sokgipa ong·e bakko ra·angenba, a·songni nisanko badalate on·angaha.
Ia manianio dol 28 contingent-rang march past-o bakko ra·angaha aro ia dolrangni march past ka·aniko Power Minister salam ka·angaha.
Ia salko manianio cultural program, bi·sarangni kal·susaani, chu·sokgipa chatro chatrirangna mande ra·pilskaani, sorkario kam ka·giparangna, ASHA-rangna, Anganwadi worker-rangna aro Garobadha PHC-na mande ra·pilskaani aro dingtang dingtang program-rangkoba ong·atangaha.
Apsan daken, Dadenggre-oba a·songni chang 77-gipa jakgitelani salko manderang kusi ong·bee maniangtokaha aro ia manianio Mahendraganj-ni MLA Sanjay A Sangma, a·songni nisanko badalate on·angangaha.
Ia manianio dol 13 parade contingent-rang march past-o bak ra·angaha aro ja·mano cultural program aro uandakgipa dingtang dingtang program-rangkoba ong·atangaha.
Indake ong·engon, North Easten Hill University (NEHU) Tura Campus-ni gitaba a·songni chang 77-gipa jakgitelani salko Chasingre-o donggipa campus-o maniangaha aro ia salko manianio NEHU Tura Campus-ni Campus-in-Charge Prof Sujata Gurudev, a·songni nisanko badale on·angaha.
Ia manianio Prof Gurudev, jinmana aganprakengon, a·songni jakgitelaniko man·na gita an·chingni pagitchamrang, neng·bee dakgrikna gita nangaha aro uamangni neng·bee dakgrikanichi ia aiao inmanbegipa India a·songko man·aha ine parakangaha.
A·songni jakgitelaniko man·na gita pagitchamrang an·tangtangni janggirangko on·gilahani gimin da·o a·songo ripinganide an·chingni jakosajok ineba ua aganaha.