MDA sorkari jako ra·ani ja·man Muster Roll-rang somoi gita dormaha man·engaha: Conrad

SHILLONG: 2018 bilsio National People’s Party (NPP)-ni dilanichi Meghalaya Democratic Alliance (MDA) sorkari jako ra·a intalan Meghalaya a·doko bang·bata department-rangan, Muster Roll worker-rangna somoi gita dormaharangko on·na man·engaha ine Bristibar salo, a·dokni Chief Minister Conrad K Sangma parakataha.
Bristibar salo, All Jaintia Muster Roll Workers & Labour Union-ni tom·bimonganiko West Jaintia Hills a·jani Ummulong-o ong·atanio Chief Minister, ia kattarangko aganaha.
Dingtang dingtang department-rango kam ka·enggipa Muster Roll worker-rang somoi gita an·tangtangni dormaharangko man·jani a·sel neng·nikanirangko chagrongna nangtokahachim ine janapatengon, “2018 bilsio chingni sorkariko jako ra·chengani somoio Muster Roll worker-rangna dormaharangko on·anio dingtang dingtang neng·nikanirangko chagrongna nangengachim. Ua somoio dingtang dingtang a·selrangchi Muster Roll worker-rangna somoi gita dormaharangko on·na man·jaengachim indiba chinga iako jako ra·e ia neng·nikaniko namatna kang·kare kaaha. Ia neng·nikaniko namatna gita chinga dingtang dingtang department-ni gisepo nambate ku·mong nangrimaniko ra·baaha aro ia department-rang somoi gita dormaharangko on·na man·na gita jagittamni tangka paisarangko skangan on·sochina gita Finance department-ko ge·etaha,” ine Chief Minister aganaha.
Somoi gita dormaharangko on·anio chagrongna nanggipa neng·nikanirangko janapatengon, “A·doko Muster Roll-ni kamko ka·enggipa manderang bang·en dongani gimin uamangna somoi gita dormaharangko on·aniara altua kam ong·jachim aro iani a·selan Muster Roll worker-rang, ru·uta bilsirangna neng·nikanirangko chagrongna nangaha. Indiba kamrangko nambatatna gita jotton ka·anichi da·alo chinga ia neng·nikaniko ka·sinsin namatna man·engaha aro da·alo Muster Roll worker-rangoni bang·batan somoi gita dormaharangko man·paengaha,” ine Sangma parakataha.
Ia neng·nikaniko salsanode chu·gimik namatna man·jawa indiba sorkari ka·sinsin dingtanganiko ra·bana man·engaha ineba Chief Minister aganaha.
“Meghalaya a·doko cabinet minister-ba ong·ja maina, game ge·e cha·gipaba ong·ja maina, a·doko songdongenggipa mande sakantini kaman a·dokna gamchatbegipa ong·a. Chingni mongsonggipa miksonganian indita bilsirangna saknaanirangko chakna nanggipa manderangna rang·speaniko on·ani ong·enga,” ine ua aganaha.
Ia tom·bimonganio, a·dokni Deputy Chief Minister Sniawbhalang Dhar aro gipin dilgiparangba dongpae bak ra·angaha.