SHILLONG: North Eastern Hill University (NEHU)-o dingtang dingtang kamrangna da·o biaprangko gapatengon, kamna seokanio Meghalaya a·dokni Tribal candidate-rangnan cholko on·chengchina gita NEHU-ni Vice Chancellor Prof Shankar Shukla-ko Khasi Students Union (KSU) didiangaha.
NEHU-ni Vice Chancellor-ko grongeani ja·man kobor ra·timgipa manderang baksa agangrikengon, uamangni mol·molani gitan NEHU-ni kamrangko on·anio joltangni Tribal candidate-rangko mikkang nichengna VC ku·rachakataha ine KSU employment monitoring cell-ni chairman Reuben Najiar parakataha.
Najiar-ni parakatani gitade, NEHU-o associate professor aro dingtang dingtang kamrango kam ka·giparangko ra·na gita adita salrangna skangsan u·iataniko on·ahachim.
Kamna dorgasto galenggipa candidate-rangko jegalani bidingo mamingko talatgija ia candidate-rangko screening committee-ni jegalahani giminba NEHU-ni VC-ko gronganio uamang agangrikaha ineba Najiar parakataha.
Skigipani kamna aro university-ni gipin academic staff-ni kamrangna nanggipa poraiani gadangrang donggipa candidate-rangba dongachim ine janapatengon, iandakgipa candidate-rangni dorgastorangkoba maming a·sel gri ra·chakjaha aro iani bidingo sing·sandioba University aganchakaniko on·na man·jaha ine KSU employment monitoring cell-ni chairman parakataha.
Najiar-ni parakatani gitade, mitam candidate-rangni dorgastorangko ra·chakani ja·manba ia candidate-rangko screening committee-ni mikkango mesokeani giminde mamingkon u·iatskajahachim.
NEHU-o registrar, finance officer aro uandakgipa kamrang ru·utbea bilsirangonin bangbang ong·e dongenga aro ia kamrangko gapatchipgija donengani a·selan NEHU-ko name chalaina gita man·jaenga ineba Najiar parakataha.
