TURA: GHADC-ni gong kror 1 tangkarangko jakkalsretanina Meghalaya Lokayukta-ni dosi changipa sak 13 manderangni kosako Sukrobar salo kachari, hearing dakenba, mande sakgni aro gong 50,000 bail bond-na ia sak 13 manderangko watpilaha.
Garo Hills-o namroro silroroaniko ra·bana gita ma·mong sorkarini chamatgipa krorni kror tangka paisarangko jakkalsretani gimin saksa Nilberth Ch Marak minggipa mandeni Lokayukta Court-o badi ka·doangani ja·man, sandirokaniko dakon, GHADC-ni gitcham MDC-rang, officer-rang aro adita sak contractor-rang dos donga ine Lokayukta nikna man·ahachim aro ia manderangni kosako ja·kurangko de·na gita Tura Sessions Court-na pakwate on·angahachim.
Kamrangko ka·gija District Council-ni tangka paisarangko oke ra·ahani gimin 2019 bilsio Williamnagar-ni social activist Nilbath Ch Marak, Asanang-ni gitcham MDC Ismail Marak aro contractor sakgni, chong·motan Nikseng Sangma aro Kubon Sangma-ni kosako Lokayukta-na badi ka·doangahachim aro uni badi ka·gipa case-ni bidingo knatimangani ja·man Meghalaya Lokayukta, GHADC-ni MDC-rang, gitcham official-rang aro contractor-rangko dosi chane raiko on·atahachim.
Tangka paisarangko jakkalsretanina Lokayukta-ni charge sheet ka·anio biming mingako man·gipa manderangara, GHADC-ni gitcham chief executive membor (CEM) Boston Marak, gitcham MDC-rang, chong·motan Mark Goera Marak, Rightious Sangma, Jimbirth Sangma, Levastone Sangma, Winnison Ch Marak, Rupert Sangma, Kenedik S Marak, Dhormonath Sangma, Ismail Marak, GHADC-ni gitcham secretary Hewingson Sangma aro contractor sakgni, Nikseng Sangma aro Kubon Sangma ong·achim.
Nilbath Marak-ni badi ka·aniko man·ani ja·man ia case-ko sandirokchina Meghalaya Lokayukta ge·etaniko on·angaha aro uandaken iani bidingo police-rang, bilsisamangna sandirokani dakon, ma·mong sorkarini chamatgipa gong kror 28 tangkarangko jakkalsretaha aro ia tangka paisarangko jakkalsretanio badi ka·ako man·gipa MDC aro contractor-rang baksana gipin MDC-rangba jak donga ine report-ko on·aha.
