TURA: West Garo Hills a·jani Selsella jolrango rama jal·langrangko namdapatna gita sorkari kamrangko ka·engoba, Selsella-o PWD (Roads)-ni sub-divisional office dongkujaengani a·sel rama jal·langrangko namdapatna kam ka·anio kamrang ka·tojaenga ine A·chik Students Welfare Association (ASWA) parakatenba, Selsella-o PWD (Roads)-ni sub-divisional office-ko kulichina gita a·dokni Deputy Chief Minister aro PWD (Roads) Minister Prestone Tynsong-na sedoataha.
“Selsella-ba West Garo Hills a·jao damsa niksenggipa jilla ong·a aro ia jolrango namroro silroroaniko ra·bana gita Selsella-o namgipa rama jal·langrangko nangenga. A·dokni pilak biaprangon rama jal·langrangko namdapatna gita sorkari kamrangko ka·engani gimin chinga mittelna ska indiba Selsella-o PWD (Roads)-ni sub divisional office dongkujaengani a·sel ia jolrango donggipa songadam nokadamrangode namgipa rama jal·langrangko man·pajaenga,” ine ASWA-ni president HN Sangma parakataha.
Selsella-o PWD (Roads)-ni sub-divisional office-ko kuligenchimode rama jal·langrangko tarianio kamrang ta·rakbatgen, joltangni manderang donge kamrangko nambate ka·na man·gen, ta·rakbate namroro silroroaniko nikna man·gen aro pilak kamrangnan nambatgipa ong·gen ineba ASWA-ni president parakataha.
“Uni gimin Selsella jolo songdongenggipa manderangni namgnina Selsella-o PWD (Roads)-ni sub-divisional office-ko kulichina anga nang·ko mol·molatenga,” ine a·dokni Deputy Chief Minister aro PWD (Roads) Minister-na sedoatgipa chittio ASWA-ni president parakataha.