AMPATI: Sukrobar salo, South West Garo Hills a·jani Kalaipara Urban Health & Wellness Centre-ko Nogorpara-ni MDC Linekar K Sangma, nokdonggae on·angaha aro ia health centre-ko nokdonggae on·anganio Boldamgre-ni MDC Stevie Marak, Meghalaya Resource & Employment Generation Council-ni Co-Chairman Semford B Sangma, Zikzak C&RD Block-ni BDO Diganto Hajong aro gipin official-rangba dongpae bak ra·angaha.
Kalaipara-ni Urban Health & Wellness Centre-ko nokdonggae on·anganio Nogorpara-ni MDC Linekar K Sangma, jinmana aganprakangengon, songni nokni manderangna ia health centre-ko kulie on·ahani gimin a·dok sorkari, district administration aro health department-ko mittelpilangaha.
Ia health centre-ko kulianichi dam 17 songrango donggipa manderangna namgni ong·gnok ine janapatengon, songo noko donggipa manderangna an·seng baljokanirangko on·na rakbee kamko ka·enga ine a·dok sorkariko mittelpilangaha.
Ia health centre-ko manderangni namgnina jakkalna man·na gita songni manderangko, health department-o kam ka·enggiparangko aro dingtang dingtang dolrangko bakrime kam ka·china gitaba Sangma didiangaha.
Songni nokni manderangna an·seng baljokaniko on·na man·na gita ia jolo donggipa nokantion paikanarangko rike on·china gitaba ua Zikzak Block-ni BDO-ko didiangaha.
Ia Urban Health & Wellness Centre-ko nokdonggaanio dongpae jinmana aganprakanggipa gipin manderangara, Zikzak Block-ni BDO Diganto Hajong, South West Garo Hills a·jani DM&HO Dr H Barman, Meghalaya Resource & Employment Generation Council-ni Co-Chairman Semford B Sangma aro gipinrang ong·a.
