Pineapple fest-ko ong·ataniara game ge·e cha·giparangko ra·dona namgipa chol: Giriraj
SHILLONG: Meghalaya sorkarini ong·atenggipa Meghalaya Pineapple Festival 2023-ko Sukrobar salo, New Delhi-ni INA-o donggipa Dilli Haat-ko Rural Development aro Panchayati Raj-ni Union Minister Giriraj Singh, a·bachengate on·angaha aro ia festival-ko a·bachengatanio, Meghalaya a·dokni Chief Minister Conrad K Sangma, a·dokni Agriculture Minister Ampareen Lyngdoh, Tourism Minister Paul Lyngdoh, Agriculture and Farmers’ Welfare Department-ni Commissioner & Secretary Vijay Kumar, Agriculture Department-ni Secretary Isawanda Laloo-ba dongpae bak ra·angaha.
Ia Pineapple Festival-ko a·bachengate on·angani somoio Rural Development & Panchayati Raj-ni Union Minister Giriraj Singh, jinmana aganprakangengon, ia festival-ko ong·atengani gimin Meghalaya sorkariko mittelpilangenba, ian gama ge·anio pangkamgipa daka rikaniko ra·dona aro game ge·e cha·enggipa manderangni janggi tanganiko tang·doatna namgipa ja·ku de·ani ong·enga ine parakataha.
“Iandakgipa maniani ba program-rangko ong·ataniara a·songo donggipa dingtang dingtang a·dokrangni gisepo gama ge·ani kamrangko skie ra·grikna aro pilakni namgninan uarangko dake nina cholrangko on·ani gita ong·a,” ine Union Minister aganaha.
Meghalaya a·dokni anarosrang cha·tobegipa ong·ani gimin namen mingsing minggamaniko man·engaha ine janapatengon, ian ia cha·tobegipa anarosrangko mesokna cholko on·anisan ong·jaenga indiba game ge·e cha·giparangni on·kangani aro rakbee kam ka·aniko mesokaniba ong·enga ine Singh parakataha.
Ia Pineapple Festival-ko a·bachengatanio, Meghalaya a·dokni Chief Minister Conrad Sangma-ba jinmana aganprakangengon, ia Pineapple Festival-ko ong·ataniara Meghalaya a·dokni daka rikani, gama ge·ani aro ku·cholsan ong·aniko mesokna re·mikkanganio mingsa chu·sokgipa ong·aniko mesokani ong·enga ine janapatenba, ian a·dokni cha·tokbegipa bostuko mesokanio jinma kusi ong·aniko mesokanisan ong·aija indiba a·doko sondongenggipa dingtang dingtang jatrangni ku·mong nangrimani, gama ge·anio changa sapani aro manderangni gisepo meli nangrimaniko mesokaniba ong·enga ine parakataha.
“Chingni anarosrangara ramram biterangsan ong·aija indiba a·sal gnanggipa a·ako mesokani, on·kange game ge·e cha·enggiparangni kam aro Meghalaya a·dokni mingsinganikosa mesoka. Da·alo chinga Meghalaya a·dokni a·briarigipa biaprangoni ia New Delhi-o tom·chimongengon, chinga an·tangtangni nokdangni on·tisa bakko a·gilsakna mesokna ra·bapaaha. Uni gimin hai ia somoio an·ching ku·cholsan ong·e Meghalaya a·dokni cha·toaniko cha·tote nipana,” ine Sangma aganaha.