SHILLONG: India a·songni jakgitelaniko man·aoni da·o bilsi 76 ong·pilengahaoba a·songni manderangna an·seng baljokani aro lekka poraniko chu·onga gita on·na man·kujaenga ine Meghalaya High Court-ni Chief Justice Sanjib Banerjee parakataha.
Sonibar salo, National Legal Services Authority (NALSA)-ni ning·o on·enggipa aro sorkari scheme-rangni bidingo awareness program-ko Ranikor-ni Nolikata Higher Secondary School-o ong·atanio Justice Banerjee, ia kattarangko aganaha.
India a·songni bilsi 76-na jakgitele janggi tanganio manderangna an·seng baljokani aro namgipa lekka poraniko chu·onga gita on·na man·kujaenga ine janapatengon, songjinmarango man·e cha·gipa aro songadam nokadamrango kangal cholgri ong·gipa manderangni gisepo bang·en dingtanggrikaniko nikna man·engkua ine Meghalaya High Court-ni Chief Justice parakataha.
A·doko songdongenggipa manderangni namgnina sorkari, bang·bea program-rangko a·bachengate on·ahaoba ia program-rangni bidingo manderangna u·iatanirangko on·jaengani a·selan ia program-rangna on·atenggipa tangka paisarangko bilsi bon·ahaode ma·mong sorkariona watatpilna nangrongenga ineba ua aganaha.
Iandakgipa program-rangoniko skie ra·china chatro chatrirangko didiangengon, an·tangtangni skie ra·gimin kamrangni gimin aro mongsongbate lekka pora aro an·seng baljokani program-rangni bidingo songadam nokadamrango aro dingtang dingtang gittimrangko agan-talate on·skachina gita Justice Banerjee, skigiparangko didiangaha.
Legal Services Authorities Act 1987-ni ning·o songgipa NALSA-ni gimin agan-talate on·angskaengon, manderangna on·gimin bilo pangchake kakket bichalko on·na gita ia bimangko songaha ine Justice Banerjee aganaha.
Ong·gija kamrangko ka·jachina aro pekatgipa samrangoni chel·e dongchina gita ua chadamberangkoba didiangaha.
