U·IATTIMGIPAONI
SHILLONG: Pattokrango donako man·engmiting somoio ong·na kragija dake sigipa manderangni nokdangna a·dok sorkari, gong lak 7.5 ka·e compensation-ko on·na u·iataha.
Pattokrango donako man·engmiting somoio ong·na kragija dake sigiparangna a·dok sorkarini gamna nanggipa tangka paisarangni bidingo Meghalaya High Court, dingtangmancha Sombar salo tik ka·e on·angaha.
High Court-ni parakatani gitade, 2018 bilsio pattoko donako man·enggipa mandeni kosako sastirangko on·ani a·sel siangna nangahani gimin gong lak 15 compensation-ko gamchina kachari raiko on·aha aro iako a·dok sorkari ra·chakenba, sianggipa mandeni nokdangna gamahachim.
“Siangani somoio ua mandeni bilsi badita ong·engachim, ukoba nie compensation-ko on·na nangnaba gnang. Mikkangchi pattoko donako man·engmiting somoio saoba sianggenchimode a·dok sorkari, uani bidingo ma·sie ra·na gita sianggipa mandeni nokdangna compensation-ko kraa gita on·na nanga,” ine High Court parakataha.
2012 bilsionin pattoko sianggipa sak 50-ni nokdangrangna compensation-ko gamchina u·iatahani gimin da·o changgipin hearing daktaiani somoioba iandake pattoko sigipa manderangni nokdangrang kachariona re·bae u·iatna man·gen ineba High Court parakataha.
2012 bilsi dipet pattoko sianggipa manderangni ma·drangrang, da·o changgipin hearing dakani somoio an·tangtangna mikkangpatimgipako seokani bidingo Registrar General, pilak English aro joltangni songbadrango advertisement-rangko on·anggen aro ia advertisement-ni korosrangko a·dok sorkari gamgen ineba Court parakataha.
