U·IATTIMGIPAONI
AMPATI: South West Garo Hills a·jao lekka porani gadangko tang·doate chatrirangna nambata janggi tanganiko on·na man·na gita Sombar salo, District School Education Office-ni gita dingtangmancha tom·aniko, Ampati Multi Facility Centre-o ong·atangaha aro ia tom·aniko ong·atanio South West Garo Hills a·jani Deputy Commissioner RP Marak, ADC-rang, Education officer-rang aro dingtang dingtang skulni dilgiparangba bak ra·angtokaha.
Ia tom·anio South West Garo Hills a·jani Deputy Commissioner RP Marak, jinmana aganprakengon, lekka porani gadangko tang·doatanio skulo poraienggipa chatro chatrirangna aro skigiparangnaba dongtoaniko on·na nangani gimin aganangaha. Lekka porani gadangko tang·doatna kam ka·anio chatro chatrirang aro skigiparangsan ong·aigija, ma·a paarang, songsalni manderang aro dingtang dingtang dolrangba bakrimaniko on·na nanga ineba Marak aganaha.
Ia tom·anio bak ra·giparang pilakan a·jao lekka porako tang·doatna gita an·tangtangni chanchiani aro ku·pattianirangkoba on·angtokaha.
Ia tom·anio bak ra·giparangoniba ku·pattianirangko on·angengon, chatro chatrirangni skulrangchi re·jringna nangani gimin, skulrango chirangko chu·onga gita man·na nangani gimin, skulrango chu·onga gita asongchakani ba sechakanirangko on·na nangengani gimin, chatro chatrirangni poraianirango ma·a paarangba bak on·pana nangani gimin, skulrango library-rang dongjani gimin aro uandakgipa dingtang dingtang kamrangni gimin chanchirimangtokaha.
