U·IATTIMGIPAONI
WILLIAMNAGAR: East Garo Hills a·jani chatro chatrirang, Meghalaya Public Service Commission (MPSC)-ni porikkarangko gipin biaprangosa sena nangengani a·sel re·a doani aro donga cha·anirango koros ong·e neng·nikanirangko man·tokna nangengani gimin East Garo Hills a·jaoba MPSC exam centre-ko kulichina gita Garo Students Union (GSU) Eastern Zone, a·dokni Chief Minister Conrad K Sangma-ko mol·molataha.
Iani bidingo GSU Eastern Zone-ni dilgiparang, Sombar salo a·dokni Chief Minister-ko Williamnagar-o grongenba memorandum-ko on·angjolaha.
Chief Minister-na sedoatgipa chittio, GSU Eastern Zone-ni president Saljrang TR Marak-ni parakatani gitade, MPSC-ni ning·o dingtang dingtang kamrangna dorgasto galenggipa East Garo Hills a·jani chatro chatrirang, MPSC porikkako gipin biaprangosa sena nange neng·nikanirangko chagrongna nangtokengachim.
“East Garo Hills a·jao MPSC exam centre-ko kuligenchimode ian dingtang dingtang kamrangna porikka seenggipa a·jani chatro chatrirangna dakchakanisan ong·aigija a·doko nambate kamrangko ka·na dakchakaniba ong·gen,” ine Marak parakataha.
East Garo Hills a·jao lekka porako tang·doatna gita ta·raken District Institute of Education & Training (DIET)-ko kulichina gitaba GSU EZ, a·dokni Chief Minister Conrad Sangma-ko mol·molataha.
2018 bilsio kuligipa Williamnagar Polytechnic-ko da·onan chu·gimik chalaina gita man·srangkujaenga ine janapatengon, iani bidingo uamang changni chang a·dok sorkarina sedoatahaoba da·alonan be·en pil·chipkujaenga ine GSU EZ-ni president, ia Williamnagar Polytechnic-ko ta·raken chu·gimik chalaichina a·dokni Chief Minister-ko didiataha.
Meghalaya a·dokni bilsi 50 gapaniko maniani ja·man Meghalaya High Court-ni Bench-ko Garo Hills-oba nangchongmotengaha ine janapatskaengon, Garo Hills-ni cholgri manderangnaba apsan daken kakket bichalko on·na gita High Court-ni Bench-ko Garo Hills-oba kulina nanga ine GSU Eastern Zone, a·dokni Chief Minister-ko mol·molataha.
