U·IATTIMGIPAONI
SHILLONG: Uniform Civil Code (UCC)-ko da·o dipet ma·mong sorkari ra·gatna chanchimitingsan ong·kuenga aro iani bidingo seanirangko name poraichenggija ba ma·sichenggijade iako jegalna gita Assembly-o resolution-ko ra·na man·jawa ine adita salrangna a·dokni Chief Minister Conrad K Sangma-ni aganahani gimin a·dokni bang·bata NGO-rangan suk ong·gijaniko parakatenba, UCC-ko da·onin rake jegalsochina gita Chief Minister-ko didiataha.
Hynniewtrep Youth Council (HYC)-ni president Robertjune Kharjahrin-ni parakatani gitade, ma·mong sorkarini UCC-ko ra·gatna miksonganian, a·songo songdongenggipa dingtang dingtang jatrangni daka rikani, bebera·ani, olakkiani aro uandakgipa dingtang dingtang niamrangko bon·ate apsan niamko ra·baskana miksonganisa ong·engani gimin iako Meghalaya sorkariba raken jegalsona gita nangenga.
“UCC-ko ra·gatahaode, ian dingtang dingtang jatrangni bia ka·ani, jikse galgrikani, deragatani, nokdang chalaiani, gam-jin man·rikani aro uandakgipa dingtang dingtang kamrango ja·rikenggipa niamrangko chu·gimik dingtangatsranggnok,” ine Kharjahrin aganenba, ian toromni gita bebera·anirangkoba bon·atgnok ine parakataha.
Ia UCC-ni miksonganiara a·song ge·san, daka rikani mingsan, niam mingsan aro torom ge·san ong·atna miksonganisa ong·engani gimin ian dingtang dingtang jat aro toromni manderangna ra·chakna man·gijagipa niam ong·enga ineba Kharjahrin parakataha.
UCC-ko name tariskana skang India a·songni Law Commission, a·song songdongenggipa dingtang dingtang jat aro toromrangni nangnikanirangkoba knachakna nanga ineba ua aganaha.
“Meghalaya a·dokni CM, uni dol ba uni sorkari da·onin UCC-ko jegalsojagenchimode ian UCC-ko ra·chakenga ine mesokanisa ong·gnok maina jrip donganide ra·chakaniko mesokanisa ong·a,” ine HYC-ni president aganaha.
A·dokni CM aro uni sorkari, UCC-ko ra·chakgenma jegalgen, da·on a·dokni manderangna name talate on·na nanga ineba ua parakataha.
Apsan daken Khasi Students Union (KSU)-ni general secretary Donald V Thabah-ba, UCC-ni bidingo Chief Minister-ni agangipa kattarangna suk ong·gijaniko parakataha aro ua an·tangan UCC-ko jegalchenggiparangoni saksa ong·eba da·o iani bidingo ku·rang on·na nom·angengaha ine parakataha.
Meghalaya a·doko UCC bak dongjana gita a·dok sorkari, ma·mong sorkarina u·iatna nanga ine dabiangengon, “Nokdangni gita man·rikani, nokdang chalaiani, jikse galgrikani, songsalni niamrang aro bia ka·anirangoba Khasi aro Garo jatrangde an·tangtangni daka rikanirangko ja·rikpagiparangsa ong·ani gimin maming dakeba UCC-ko ja·rikna man·jawa,” ine Thabah parakataha.
FKJGP-ni president Dundee Cliff Khongsit-ba UCC-ko jegalatengon, BJP-chi dilenggipa NDA sorkari UCC-ko ra·gatna miksongmanchaanirang dongengaha ine mikrakataniko on·angaha.
“Maini gimin an·ching UCC-ni draft-na senge dongna nangenga? UCC-ko ra·gatahaode an·chingni daka rikani aro bebera·anirangna nangchakeaniko ra·bagnok ine an·ching namen ma·sienga indide maini gimin da·alonin iako sorkari jegalsona man·jaenga?” ine Khongsit sing·doataha.
Re·baenggipa 2024 bilsini Lok Sabha election-na skangan ma·mongni BJP sorkari, UCC Bill-ko pass ka·naba gnang ineba FKJGP-ni president mikraksamsoataniko on·angaha.