U·IATTIMGIPAONI
SHILLONG: National Education Policy (NEP) 2020-ko ia bilsionin NEHU-ni ra·gatenganiko jegale, a·dokni dingtang dingtang college-rango skigiparang, first semester class-rangko ra·gija jingjengatengani gimin ia skigiparangni nangnikanirangko chu·sokatchengna nangchongmota ine a·dokni Chief Minister Conrad K Sangma parakataha.
NEP 2020-ko ia academic session-onin NEHU-ni ra·gatenganiko jegale Meghalaya College Teachers Association (MCTA)-ni first semester class-rangko ra·gija jingjengatenggipani gimin sing·anina aganchakaniko on·angengon, college-rango skigiparang, NEP ra·gatanikode jegalenga ong·jani gimin skigiparangni nangnikanirangkoba nichengna nangao ga·akenga ine Chief Minister parakataha.
“MCTA-ni skigiparang angko gronge agangrikaha aro uamangni suk ong·gijaniara da·o NEP-ko ra·gatenga ong·ode bani tangka paisarangchi aro classroom-rangchi a·bachengna miksongenga uasa ong·enga. An·ching da·o bilsibrini course-ko a·bachengenba second aro third year-rango skigiparang dongjagenchimoba maiko dakgen? Ia skigiparangni jegalaniara ong·a aro iako namatna nangchongmota,” ine Sangma aganaha.
Chief Minister-ni parakatani gitade, NEP-ko ra·gatengon, maikai ra·gatna miksongenga aro baditana kingking uamang dakchakanirangko man·gen ukosa skigiparang ma·sina nangniktokengachim.
NEP-ko ra·gate re·mikkangengon, ia pilak nanganirangkon namatna gita nanggen ineba ua aganaha.
Indake ong·engon, NEP-ko ra·gataniara gital gadangona re·mikkanganisa ong·enga aro gital gadangona re·mikkanide maming dakeba altua kam ong·jawa ine Chief Minister parakataha.
“Uni gimin an·ching ia gital gadangona re·na gita somoikode on·na nangaigen. An·chingna ia gital niamko ra·gatengon classroom-rangko, skigiparangko aro dingtang dingtang cholrangko nangdapengani gimin ian altua kam ong·jawa ine angaba ma·sienga. Ia kamna an·ching tangka paisarangko nangdapgen aro haida ia kamna komibeoba kror 400 ba 500-mangkode nangnaba gnang,” ine Sangma aganaha.
Ia kamo baditana kingking sorkari dakchakanirangko on·na man·gen uamang cholrangko nichengna nanggen ine janapatengon, “Ia pilak kamrangko changsanode chu·sokatna man·jawa aro ia kamo bang·en tangka paisarangko nanggen ine an·ching ma·sina nanggen. Indake ong·genchimoba an·ching re·mikkangana agrede maming gipin cholrang dongjawa aro a·dokni college ge·antian iako ra·chakanian nambatgipa ong·a ine ma·sigen,” ine Chief Minister parakataha.
