U·IATTIMGIPAONI
TURA: Re·anggipa July 24 tariko, Tura-ni Mini Secretariat-o manderangni jinma so·sojengjeng ong·atani case-o Tura-ni BJP MDC Bernard N Marak-na Mongolbar salo, High Court interim relief-ko on·angaha.
Iani bidingo ua an·tangni ukilrangchi High Court-o Writ Petition dakani ja·man Marak-na interim relief-ko on·angaha.
Ia so·sojengjeng ong·anio a·dokni Chief Minister Conrad Sangma-ko chadrapna gita manderangko didianio Bernard-ba jak donga ine police-rang a·kangahaoba ua an·tangde ia a·sel ong·anio maming dakeba jak dongja ine Tura-ni MDC a·kangskaahachim ine nikna man·a.
Indake ong·genchimoba, Tura-ko Winter Capital songchina aro Reservation Roster-ko backlog policy gnang ra·gatchina dabie ACHIK, GSMC aro uandakgipa dolrangni okumu chake jingjengataniode Marak an·tangba chakpaaniko on·angahachim ine nikna man·a.
Iani bidingo a·dokni Chief Minister Conrad Sangma, ACHIK, GSMC aro uandakgipa dolni dilgiparang baksa Tura-ni Mini Secretariat-o tom·e agangrikengmiting somoio a·palo senge dongenggipa manderang, rang·san ro·ongrangko goe so·sojengjeng ong·atna a·bachengahachim aro ia so·sojengjeng ong·anina police-rang sak 50-mangni manderangko biming mingenba rim·ahachim.
Police-rangni biming minggipa sak 50 manderangoni Tura-ni MDC Bernard Marak-na saksa ong·paachim.
Indake ong·engon, Tura-ni MDC aro gipin manderangni kosako police-rang, Unlawful Activities (Prevention) Act-ni ning·o mokordoma ka·ahani gimin una anticipatory bail-kode on·na man·jawa ine High Court parakataha.
Gong 50,000 personal bond baksana uko sing·sandina nangani somoirango ua kachario ba police-rangna mikkangpaena gita nanggen ine High Court, Marak-na interim relief-ko on·angenba, uko jamino watchina ge·etaniko on·angaha.
