U·IATTIMGIPAONI
RESUBELPARA: An·tangni depante Algore D Shira-ko North Garo Hills District Selection Committee (DSC)-ni membor songani bidingo mitam manderang matnangtokengani gimin Mendipathar constituency-ni MLA Marthon J Sangma talataniko on·angenba, kamna manderangko seokanio dongnuani dongjachina gita uko constituency-ni manderangsa DSC membor songchina dabitokaha ine parakataha.
North Garo Hills a·jao, DSC-ni kamrango dakchake on·na gita Resubelpara-ni Pangsik G Momin-ko vice chairman, Mendipathar-ni Algore D Shira aro Kharkutta-ni Henry Lamin Momin-koba DSC-ni membor-na songahachim ine nikna man·a.
DSC-ni vice chairman-na songako man·gipa Pangsik G Momin-ara, Resubelpara-ni MLA aro Meghalaya Legislative Assembly-ni Deputy Speaker TD Shira-ni depante ong·a, DSC-ni membor-na songako man·gipa Algore D Shira-de Mendipathar MLA Marthon J Sangma-ni depante ong·skaa aro DSC-ni sakgipin membor Henry Lamin-ara Kharkutta MLA Rupert Momin-ni nangchapgipa mande ong·skaachim aro iani bidingo mitam manderang, sorkariniko kamko raken jegaltokahachim ine nikna man·a.
Iani bidingo talataniko on·angskaengon, “Angni depante, Mendipathar constituency-ni manderangna kamko ka·enga aro iani giminsa manderang angni depante aro angni kamo ka·dongenba ia kamko una on·china dabitokaha. Anga an·tangba Mendipathar-o changgittamna MLA ong·engaha aro anga angni manderangna kam ka·jagenchimode ia ong·na amjawachim. DSC-ni kamrangna manderangko seokanio dongnuani dongjana gita angni constituency-ni manderangsa angni depanteko DSC-ni membor songchina dabitokaha aro anga an·tangba angni depanteo chu·gimik ka·dongenga,” ine Marthon Sangma parakataha.
Sangma-ni parakatani gitade, DSC-ni kamna dorgasto galenggipa candidate-rang bang·a changon ku·mitdu du·enga ine matnanganirangko man·soengani gimin iani bidingo kakketko ma·sina aro mikkangchi kakketo kamrangko on·na miksonganiosa uni depantekoba DSC-ni membor songaha.