U·IATTIMGIPAONI
SHILLONG: Bristibar salo, Shillong songjinmani Anton Hall sambao, St Edmund’s Higher Secondary School-ni bilsi 17 ong·gipa chatro saksako, ta·rakbee salbaenggipa bike bolsa salgakeaha aro bike salgakako man·e ia chatro bilongbee saknaanirangko man·na nangaha.
Koborko on·ani gitade, bike salgakako man·gipa chatroara St Edmund’s Higher Secondary School-o poraienggipa Edmund Marpan ong·achim aro ia a·sel ong·aniko CCTV-o man·rikani gitade, ia a·sel ong·ani somoio ua Anton Hall sambao donggipa gate-oni ong·katbae, ramako batsotengachim.
Uni ramako batsotangengmiting somoio ta·rakbee salbaenggipa bike bolsa uko salgakeaha aro bike-chi salgakako man·e ua adita biapona tang·angpilaha.
Uko bike-o salgakegipa mandeara, Shillong Commerce College-o poraienggipa chatro ong·achim aro uko Eukratis Mylliempdah mingskaachim ine ma·sina man·aha.
Ia chatroko salgakea bakan ramao donggipa manderang aro bike nokgipaba una dakchakanirangko on·aha aro ja·mano ia chatroko taxi-o Woodland Hospital-ona salangaha.
Da·o dipet koborko man·soani gitade, bike salgakako man·e ia chatroni jakrani ja·a be·aha aro skorangoba adita mata bu·anirangko man·aha.
Indake ong·engon, ia chatroko nambate sanna man·na gita Guwahati-ona ra·angenga ineba kobor man·soaha.
