U·IATTIMGIPAONI
SHILLONG: Meghalaya a·doko medical college damgittamko kulina gita Sukrobar salo, Meghalaya Cabinet ra·chakangaha aro ia medical college-rang adita bilsirangni gisepon matchotgen ine ka·dongsoenga.
Cabinet tom·ani ja·man kobor ra·timgiparangna talate on·angengon, ia medical college damgittamara Shillong, Tura aro Jowai-o ong·gen aro iana dingtangmancha sorkari, committee-ko songenba, ia college-rangko kulina gita proposal-koba tariangaha ine Health department-ni Principal Secretary Sampath Kumar parakataha.
Kumar-ni parakatani gitade, Shillong Medical College-na, da·o dongsogimin Shillong Civil Hospital aro Ganesh Das Hospital gita dakgipa cholrangko ra·e bilakbatatna aro a·dokni specialist doctor-rang aro gipinrangko ia medical college-ni faculty membor dake jakkalani cholrangko nina sorkari tik ka·angaha.
Tura medical college-ni kamrangkode da·o ka·engahani gimin ia medical college-ko mingnamgipa medical institute-rang baksa bakrime PPP mode-o chalaina gita sorkari cholrangko nina tik ka·e donangaha ine Health department-ni Principal Secretary parakataha.
Ri Bhoi a·jao kulina sienggipa medical college-ni gimin janapatskaengon, University of Science & Technology Meghalaya (USTM), dingtangmancha PA Sangma International Medical College-ko kulina kamrangko a·bachengataha aro ia medical college-o a·dokni chatro chatrirangna dingtangmancha seat-rangko indin ba komibata damrango on·na tik ka·aha ine Kumar parakataha.
Health official-ni parakatani gitade, Shillong medical college-o a·bachengode dam 50 seat-rangsan dongaigen indiba ja·mano ia institute-oni kam ka·giparang ong·katahaon, iako 100 bedded facility-ona ra·doatgen.
Tura medical college-nade building-ni mongsonggipa bakko re·baenggipa bilsini May jao matchotgnok ineba Kumar parakataha.
Ia dam gittam medical college-rangko mission mode-o jako ra·na sorkari miksongenga aro bilsigni ba bilsigittamni gisepon matchotatna miksongenga ineba Kumar parakataha.
Indake ong·engon, a·doko allopathy doctor-rang, AYUSH physician-rang, dental surgeon-rang aro nurse-rangko kam ra·na gita dingtangmancha Meghalaya Medical Services Recruitment Board (MMSRB)-ko songna gitaba Sukrobar salo a·dokni Cabinet ra·chakangjolaha.
