Ja 12-ni gisepo Expert Committee, sorkarina report-ko on·gen
U·IATTIMGIPAONI
SHILLONG: Meghalaya a·dokni Reservation Policy-ko gital dake nipiltaina songgipa Expert Committee-ni membor sakbongako Sukrobar salo, Meghalaya Cabinet-ni tom·anio ra·chakangaha.
Iani bidingo kobor ra·timgiparangna talataniko on·angengon, ia expert committee-ni mongsonggipa daitoranga, da·o dongenggipa reservation policy-ko poraienba, nanggenchimode taridapna nanganirangko sorkarina ku·pattina aro a·doko songdongenggipa dingtang dingtang dolrang baksa agangrikna gita a·dokni dingtang dingtang biaprangona re·ange agangrikanian ong·gen ine Sukrobar attamo, a·dokni Cabinet Minister aro MDA sorkarini ku·wattimgipa Ampareen Lyngdoh parakataha.
Ia Expert Committee-ko ja 12-ni gisepon report-ko on·china gita sorkari u·iataha ineba Lyngdoh parakataha.
Lyngdoh-ni parakatani gitade, Madhya Pradesh High Court-ni gitcham Judge, Justice (Retired) Mool Chand Garg-ko ia Expert Committee-ni chairman songaha aro Allahabad High Court-ni gitcham Judge Justice (Retd) Dr Satish Chandra-koba ia committee-ni expert member in Constitution Law dake songaha.
Ia expert committee-ni gipin sakgittam membor-rangara, NEHU Shillong-ni ning·o donggipa Sociology Department-ni Prof DV Kumar, Indian Institute of Population Sciences, Mumbai-ni ning·o donggipa Fertility & Social Demography Department-ni Prof Chander Shekhar aro IIM Shillong-ni ning·o donggipa Economics & Public Policy-ni Assistant Professor Subhadip Mukherjee ong·a ineba Lyngdoh parakataha.
