U·IATTIMGIPAONI
SHILLONG: Meghalaya State Reservation Policy-ko gital dake nipiltaina a·dok sorkari, Expert Committee-ko songmanahaon, ia Reservation Policy-ko nipilmangmanganikosan ong·ja indiba taridapanikoba nangnikenga ine Khun Hynniewtrep National Awakening Movement (KHNAM) parakataha.
KHNAM-ni dilgipa Thomas Passah-ni parakatani gitade, a·bachengonin uamang, Reservation Policy-ko nipilmangmangaigija gital dake taridapchina gitasa dabiengachim.
“State Reservation Policy-ko taridapchina gitasa chinga a·bachengonin ku·rang on·aha aro da·oba on·kuenga. Iani giminsa chinga Reservation Policy-ko gital dake taripiltaichina kragipa kattako jakkakani bidingoba janapahachim,” ine Passah aganaha.
Passah-ni aganani gitade, Reservation policy-ko ‘poraie nina’ gitasa sorkari expert committee-ko songaha aro iano sorkarini katta jakkalaniara bilsi 50-na skang tarigipa reservation policy-ko gital dake taripilchina dabianiko dingtangatna jotton ka·ani gitasa ong·ahachim.
“Sorkarini iandakgipa kamna chinga kusi ong·jaha,” ine ua aganaha.
Expert committee-o Khasi-Jaintia aro Garorangoniko membor-na seokjahani giminba KHNAM suk ong·gijaniko parakataha.
State Reservation Policy-ko gital dake nipiltaianiara Khasi-Jaintia aro Garo jatrangna nangchakgipa kamsa ong·ani gimin iano darangnaba mikkang niteani dongjana gitasa ia dolgnionikon darangkoba ia committee-o donjaha ine iana skang a·dokni Cabinet Minister Ampareen Lyngdoh, talataniko on·manahachim ine nikna man·skaa.
Meghalaya a·dokni Reservation Policy-ko gital dake nipiltaina songgipa Expert Committee-ni membor sakbongako Sukrobar salo, Meghalaya Cabinet-ni tom·anio ra·chakangahachim ine nikna man·a.
Madhya Pradesh High Court-ni gitcham Judge, Justice (Retired) Mool Chand Garg-ko ia Expert Committee-ni chairman songaha aro Allahabad High Court-ni gitcham Judge Justice (Retd) Dr Satish Chandra-koba ia committee-ni expert member in Constitution Law dake songahachim.
Ia expert committee-ni mongsonggipa daitoranga, da·o dongenggipa reservation policy-ko poraienba, nanggenchimode taridapna nanganirangko sorkarina ku·pattina aro a·doko songdongenggipa dingtang dingtang dolrang baksa agangrikna gita a·dokni dingtang dingtang biaprangona re·ange agangrikanian ong·gen ine a·dokni Cabinet Minister aro MDA sorkarini ku·wattimgipa Ampareen Lyngdoh parakatahachim.