U·IATTIMGIPAONI
SHILLONG: National Education Policy (NEP) 2020-ko ia 2023-24 academic session-oni ra·gataniko jegale, Meghalaya College Teachers Association (MCTA) jingjengatanirangko dakengon, salgro salaram jolrango poraienggipa chatro chatrirangni namgnina chanchipiltaie, iani bidingo agangrikna re·bachina NEHU-ni Vice Chancellor Prof PS Shukla, skigiparangko okamataha.
Iani bidingo u·iataniko on·angengon, college-rango skigiparang baksa ma·sisretgrikanirangko aro pilak neng·nikanirangko agangrikachi namatna gita ua MCTA-ko agangrikna okamatenga ine NEHU-ni Vice Chancellor parakataha.
Four Year Undergraduate Program (FYUP) Scheme-ko ra·gataniara lekka porani gadangko tang·doatna nambegipa chol ong·enga ine janapatengon, iandakgipa ja·kuko de·anichi chatro chatrirangna nambata janggi tangani cholrangko on·na man·gen ine Prof Shukla an·tangni ka·dongchakenganiko parakataha.
NEP 2020-o dongimin niam gita FYUP-ko ra·gatgipa college-rangkoba ua dingtangmancha mittelpilataha.
“2023-24 bilsini Academic session a·bachengengahaon, Meghalaya a·doko nambata lekka porako ra·bana gitasa NEHU aro ia university-o bak ong·enggipa college-rang da·alo re·chakatenga,” ine Prof Shukla parakataha.
Ia academic session-ni skanggipa sal 45-kode nikmanaha ine janapatengon, ia NEP 2020-ko NEHU-o bak ong·enggipa pilak college-rangan ra·chakgnok ine NEHU-ni Vice Chancellor, an·tangni ka·dongchakenganiko parakataha.
Prof Shukla-ni parakatani gitade, NEP 2020-ko mikkang bilsioni ra·gatskachina college-rangoni darangba agangiparang dongjaengani gimin ian a·doko lekka pora namdapatna gita kam ka·anio ia college-rangni on·kanganiko mesokani ong·enga.
FYUP scheme-ko name ra·gatna gita kamrangko ka·engani gimin ua dingtang dingtang college-ni administration-rangkoba mittelpilataha.
“Meghalaya a·doko higher education-ko tang·doatna aro chatro chatrirangni namgnina ia college-rango dangdike on·enggipa principal-rangni kamko pilakan nikenga,” ine Prof Shukla parakataha.
