U·IATTIMGIPAONI
TURA: Meghalaya National Health Mission (NHM)-ni gita Mid-Level Health Provider (MLHP)-ni kamna ra·anio A·chik candidate-rangko nichanggale, gipin biaprangni candidate-rangkosa ra·ahani gimin Sombar salo, Tura-ni BJP MDC Bernard N Marak, ma·mong sorkarini Union Health & Family Welfare Minister Mansukh L Mandaviya-na sedoataha.
MLHP-ni kamna ra·anio A·chik nurse-rangko nichanggalahani gimin suk ong·gijaniko parakatengon, “Ian Garo Hills-ni manderangna namen gisik saataniko ra·baani ong·aha maina ia kamna A·chik nurse-rango qualify ong·gipa candidate-rang bang·en dongachim indiba ia kamo A·chikrangko nichanggale, gipin biapni candidate-rangnasa on·skaaha,” ine Marak parakataha.
Union Health Minister-na sedoatgipa chittio Tura MDC-ni parakatani gitade, ia kamrangara Garo Hills-nasa ong·genchimoba MLHP-ni kamrangna Woodland Nursing Institute aro NEIGRIHMS-nikosa dingtangmancha mikkang nitee ra·skaahachim.
“Ia kamna A·chikrangoniba man·na nanggipa candidate-rang donggenchimoba A·chik candidate-rangoni saksakoba kamo ra·gija gipin biapni candidate-rangnasa on·skaaha. Result-ko parakani ja·mande kamrangkoba bang·bate mesokaha aro ian kamo ra·ani bewalko chanchichipna kraataha. Uni gimin watchanggalako man·gipa candidate-rangna kakket bichalko on·na man·na gita iani bidingo sandirokaniko dakna nangchongmota,” ine Marak janapatenba, Garo Hills-ni gital dake candidate-rangko ra·taina nanga aro je kamo ra·gimin candidate-rangkoba ra·galpilgija uamangni kam ka·tonagipa biaprango donatskana nanga ine didiataha.
Marak-ni parakatani gitade, Garo Hills-ni diltugipa biaprangode manderangni ku·sik man·gipa candidate-rangkosa donna gita nangchongmotengachim.
Garo Hills-o B.Sc Nursing aro GNM-ko recognize ong·gipa institute-rangoni pass ka·gipa candidate-rang dongjani a·selsa gipin biaprangoni candidate-rangko kamo ra·skana nangaha ine sorkarini talatanikoba Marak raken jegalataha aro MLHP-ni kamna A·chikrangoniba B.Sc Nursing aro GNM graduate-rang bang·en dongachim ine talataniko on·angaha.
