U·IATTIMGIPAONI
TURA: A·chikrangoni skanggipa political dilgipa Pa Sonaram R Sangma-ni chang 107-gipa siani salko August-ni 27 tariko Sonaram Memorial Trust Society aro Garo Students Union (GSU) Assam State Zone (ASZ) nangrimemba, Assam Goalpara a·jani ning·o donggipa Bakrapur songo maniangaha.
Pa Sonaram Sangma-ni siani salko pangna bilsian Sonaram Memorial Trust Society, GSU ASZ baksa nangrimenba, Bakrapur songo manidilrongenga aro uandaken ia changoba uni siani salko dingtangmancha program-ko ong·atenba apsan biapon maniangtaiaha.
Pa Sonaram R Sangma A·chikrangni gisepo skanggipa politics-ni kamko ka·dilchenggipa aro an·chi pari nika gri British sorkarini kosako dakgrikdilchenggipa ong·achim. Ua da·ororoni manderang gita skia man·begipa mande ong·pajaoba namen ka·donggipa aro an·tangni bebera·anio mogija kim·kimgipa ong·achim. Ua A·chik jatko gipin jatrangni sinchep dokchep dakanirangko nike A·chik jatko chel·chakna gita an·tangko on·kange kamko ka·aha aro uandaken ua 1899 bilsimango jatna aro a·songtangna kamko ka·chakataha.
Pa Sonaram Sangma, 1916 bilsini August 27 tariko, be·enni gita saaniko man·e Bakrapur songon a·gilsakko wate re·angaha.
Indake ong·engon, Pa Sangma sagini chang 107-gipa siani salko manianio Assam a·doko donggipa Bokajan Legislative Assembly Constituency-ni MLA Dr Numal G Momin mongsonggipa sokgipa ong·e jinmana aganprakangengon, Pa Sonaram A Sangma sagini kamrangko gisik ra·atpilangenba, una mande ra·pilskaaniko on·na gita A·chik sakantikon, jatna aro a·songna dangdike on·giparang ong·china gita didiangaha.
Ia salko manianio Garo Hills Autonomous District Council (GHADC)-ni Deputy Chief Executive Membor Nikman Ch Marak aro gipin dilgiparangba dongpae bak ra·angaha.