U·IATTIMGIPAONI
SHILLONG: Sombar salo, Meghalaya a·dokni West Khasi Hills aro Assam-ni Kamrup (Rural) regional committee-rang tom·e chanchirimangtaienba, a·dok damgnini gisepo golmal ong·enggipa Langpih jolrangko re·baenggipa September jani bon·angchibara apsan re·ange nina tik ka·angaha.
Iako Sombar salo, Meghalaya a·dokni Cabinet Minister aro West Khasi Hills regional committee-ni chairman Paul Lyngdoh, Kamrup regional committee-ni dilgiparang baksa tom·e chanchirimani ja·man kobor ra·timgiparangna parakataha.
Lyngdoh-ni parakatani gitade, ia tom·anio dolgni regional committee-rang tom·e chanchirimangenba, a·dok damgnini gisepo meligrikna man·jaenggipa Langpih jolrangko apsan re·ange nina gita mongsonggipa biaprangko segate donchina, West Khasi Hills aro Kamrup a·jani deputy commissioner-rangko ge·etangaha.
Meghalaya aro Assam a·dok damgnian da·o Assembly Session-rang dongani gimin, Assembly Session matchotahaon ia dolgni regional committee-rang tom·e chanchirimtaina gita songni bimingrangko see donchina West Khasi Hills aro Kamrup-ni deputy commissioner-rang baksana MLA-rang aro MDC-rangna daitoko on·angaha ineba Lyngdoh parakataha.
“Assam aro Meghalaya a·dokni gisepo meligrikna man·jaenggipa Langpih jolrango mongsonggipa biaprangko chinga sandienga aro ia biaprangko apsan re·ange nina tik ka·aha. Assembly session matchotani ja·man chinga dolgni regional committee-rang tom·aniko ong·attaina siengani gimin meligrikna man·jaenggipa mongsong biaprangko see donchina West Khasi Hills aro Kamrup-ni deputy commissioner-rang baksana MLA-rang aro MDC-rangna kamko on·angaha. September ja bon·angachibara chinga dolgni regional committee-rang, ia biaprangko apsan re·ange niegen,” ine West Khasi Hills regional committee-ni chairman parakataha.
Lyngdoh-ni parakatani gitade, je biaprangon maming golmalrang dongjachim aro je biaprango songdongenggipa manderang, Meghalaya a·dok ning·o ong·na nangniktokengachim, uandakgipa songrangkode uamangni nangnikani gita dakna on·gen ine dolgni regional committee-rangan tik ka·manahachim.
