U·IATTIMGIPAONI
SHILLONG: Ia 2023 bilsini Meghalaya Legislative Assembly election-o bikotdaldalgipa Voice of the People’s Party (VPP), seat dambriko chena man·ahani gimin re·baenggipa 2024 bilsio ong·atna sienggipa Lok Sabha aro district council, chong·motan Khasi aro Jaintia Hills Autonomous District Council (KHADC & JHADC) election-rangoba chu·sokgipa ong·na ka·dongenga.
Re·baenggipa bilsio ong·atna sienggipa Lok Sabha aro District Council election-rango chegipa ong·na ka·dongenganiko parakatengon, a·doko gipin dolrang gita VPP-ni membor-rangde doltangko wate katgiparang ong·ja aro wate katgipa manderangnaba biap dongja ine VPP-ni dilgiparang parakataha.
VPP-o gipin dolrangoni napna miksongenggipa manderang dongama ine sing·anina aganchakaniko on·angengon, “Chingni dolo gipin dolrangoni napna miksonggiparang da·o dipet dongja aro chingna uamangko nangaba nangja. VPP-de doltangko wate katgipa manderangko nangnikja aro iandakgipa kamna didigipaba ong·ja. Dolsaoni dolgipinona katjojogipa manderangkode chingna nangaba nangja,” ine VPP-ni ku·wattimgipa Batskhem Myrboh parakataha.
Myrboh-ni parakatani gitade, re·baenggipa bilsio ong·atna sienggipa Lok Sabha aro district council election-rangna VPP-ni membor-rang bilake kamrangko ka·sotokengaha.
Enrolment drive-rangna re·ani somoirangoba uamang doltangna campaign ka·joljolenga ine janapatengon, 2024 bilsini Shillong Parliamentary election-na VPP-ni candidate-ko tik ka·manaha ine VPP-ni dilgipa parakataha.
“Khasi Hills-ni pilak kona noksikrangonikon chinga manderangni chakpaanirangko man·engaha aro Lok Sabha election-o chinga altuaen Shillong seat-kode chena ka·dongenga,” ine Myrboh aganaha.
Khasi-Jaintia Hills a·jarangode VPP, gipin dolrangna bate bilakbatenga ine janapatengon, “VPP-ara namen dingtanggipa dol ong·a aro gipin dolrang gita ong·gija Assembly election-onin VPP-de dal·roroengaha,” ine Myrboh parakataha.
