U·IATTIMGIPAONI
TURA: Mongolbar salo, a·dokni Animal Husbandry & Veterinary Minister AL Hek, uni skanggipa changna Garo Hills-ona re·baanio, Meghalaya Milk Mission & National Program for Dairy Development-ni ning·o gital rikgipa Milk Parlor-ko aro National Program for Dairy Development-ni ning·o rikgipa Workers Amenity Block-ko Ganol-o donggipa New Dairy Complex-o kulie on·angaha.
Rashtriya Gokul Mission (RGM)-ni ning·o MAITRI (Private Artificial Insemination Worker)-rangni skanggipa batch-na miksonge ra·bagipa motorcycle bolgnikoba AH & Vety Minister pakwate on·angjolaha.
Iana skang ua Garo Hills gimiko donggipa AH & Vety department-ni officer-rang baksa tom·e chanchirimangengon, jilla kaani a·bao manderangn janggi tangani cholrangko on·na man·na gita kamrangko namdapatchina aro dingtang dingtang ra·bianirangko chel·chakna gita ku·cholsan nangrime kamko ka·china gita Garo Hills-ni officer-rangko didiangaha.
AH & Vety department-ni ning·o ra·gatgipa scheme-rangko aro dingtang dingtang sorkari farm-rangkoba Hek niangjolaha.
Jilla kaanirangko dake cha·enggiparangna aro be·en bitinrangko pale cha·enggiparangna chu·onga gita wakrangko, do·orangko aro matchurangko on·na man·na gita poultry farm, pig farm aro cattle farm-rango kam ka·enggiparangko nambate kam ka·china gitaba Minister didiangaha.
Rongkhon-o donggipa poultry farm aro cattle farm-rangkoba ua niangaha aro ia farm-rangko nambate chalaina man·na gita dakchakanirangko on·naba ku·rachakangaha.
AH & Vety Minister-ni re·baanio dongpae bakko ra·anggipa gipin manderangara, AH & Vety department-ni Secretary Dr C Manjunathan, West Garo Hills-ni Deputy Commissioner Jagdish Chelani, Rongram BDO TN Sangma, AH&V-ni Director Dr R Ch Momin aro gipinrang ong·a.
