U·IATTIMGIPAONI
SHILLONG: Mawsynram-ni gitcham MLA aro BJP Meghalaya-ni dilgipa HM Shangpliang, National People’s Party (NPP)-o napna skaniko parakmanaha ine NPP-ni dilgiparang an·tangtangan parakatahaoba, iako BJP MLA aro a·dokni Cabinet Minister AL Hek jegalatskaaha.
Hek-ni kobor ra·timgiparangna parakatani gitade, ua Budbar attamosan Shangpliang-ko grongahachim indiba uni NPP-o napna miksongenggipani bidingo uamangni gisepo mamingkoba agangrikjaha aro iani bidingo ua an·tangde da·onan maming kobor dongkujaengachim.
Shangpliang-na showcause notice on·na miksongenggipani gimin sing·on, iako party-ni gitasa jako ra·anggen ine Hek parakataha.
Re·baenggipa 2024 bilsini Lok Sabha election-o BJP-na susagnini gimin janapatskaengon, election-o susaanikode ma·mongni dilgiparangsa tik ka·na siengani gimin da·o dipet sawa badia constituency-o susagen, uamangni gisepo chanchia dongkuja ine BJP MLA parakataha.
Lok Sabha election-o ua an·tangba susana skanirang dongama ine sing·on, iani bidingo ua jegalaba ong·ja aro ra·chakaba ong·ja dake, BJP-ni dilgiparang uko nangnikgenchimode ua election-o susana kusi ong·aigen ine Hek parakataha.
BJP dolara national party-sa ong·ani gimin Shillong aro Tura Lok Sabha constituency damgnion susana nanga ineba ua aganaha.
Indake ong·engon, gas cylinder-ni damko gong 200-ni komiatna ma·mong sorkarini tik ka·aniara da·o election-na skang dakmikanisan ong·aia ine manderangni matnangtokengani gimin sing·anina aganchakaniko on·angskaengon, opposition dolrangonide pangnan jegalanide dongaigen ine Hek parakataha.
“Na·a nama dakgenchimode nang·ni bobilrangde jegalaigen. Chinga manderangna namgniko dakenga ong·ode maina manderang matnangna nanga?” ine Hek sing·doataha.
