U·IATTIMGIPAONI
SHILLONG: National Education Policy (NEP) 2020-ko ra·gatani bidingo an·tangni chanchianiko parakatani ja·man, NEP 2020-ko ra·gatna skang a·dokna biap aro somoiko on·chengchinasa ua aganenga ine Bristibar salo, AITC-ni state president Charles Pyngrope talataniko on·angaha.
St Edmund’s College-ni gitcham principal baksa uni agangrikaniko songbadrango seanikoba ua jegalataha aro ia college-ni gitcham principal-ba NEP-ko jegalengade ong·ja indiba NEP 2020-ni bidingo expert-rangchi name nipilchenganikosa nangnikenga ine Pyngrope parakataha.
“St Edmund’s College-ni gitcham principal-ba NEP 2020-ko expert-rangchi nipiltaichengakosa nangnikenga indiba ian NEP 2020 ra·gataniko ua jegalengade ong·jachim,” ine ua aganaha.
NEP-ko ra·gatani bidingo an·tangni chanchianiko talatangengon, “NEP-ko dingtang dingtang dake jegalanirang dongengani gimin anga an·tangba iani bidingo nichengenba, NEP-ko ra·gatna skang, somoi aro biapko on·chenganikosa nangnika. NEP-ko drae ra·gatani pal iano nangchakegipa pilak manderang baksa apsan chanchirimna man·ode nambatachim,” ine Pyngrope parakataha.
NEP 2020-ni skanggipa page-o India sorkarini Human Resource Development Ministry-ni gita ka·dongsoanirangko parakgipani gimin janapatengon, “Iani bidingo anga indake talataniko on·na ska, chong·motan NEP 2020-ko tarianio an·chingna somoi aro biapko on·dapkuna nanga,” ine AITC-ni state president parakataha.
NEP 2020-ara pilak gadangon lekka porani gita a·songni tang·doaniko niksamsoe tarianisa ong·achim ineba Pyngrope aganaha.