U·IATTIMGIPAONI
SHILLONG: Meghalaya Legislative Assembly-ni gital nokko rikna tik ka·chengani somoio korosko gong kros 145-na tik ka·e, ia kamko ka·na gita Uttar Pradesh a·dokni Rajkiya Nirman Nigam Limited-na on·ahachim aro uni ja·man ia gital Assembly nokko rikani koros gong kror 177.7-ona tang·doangaha aro da·oba changsataie, ia Assembly nokko rikani koros gong kror 200-ona tang·doangaha.
Ia gital Assembly nokko matchotna gita da·o dipet maming somoi donsoa dongkujaengoba korosrangde tang·dorikrikangskaenga aro mikkangchiba iako rikani koros tang·doangkunaba gnang ine niksamsona man·enga.
Ia gital Assembly nokko matchote rikna gita gimik gong kror 200 tangkarangko nanggnok ine Budbar salo, Assembly-ni Speaker Thomas A Sangma parakataha.
Ia gital Assembly nokko rikani koros tang·doangani bidingo talataniko on·angengon, ia nokni a·pako apalbatatahani gimin nokni dal·aniba apalbatangaha aro iani a·selsa korosba bariangaha ine Sangma parakataha.
Assembly Speaker-ni parakatani gitade, ia nokko da·o riktaiengahaoba adita neng·nikanirangko man·taina nangenga indiba re·anggipa 2022 bilsini May jao ia nokni protchong be·grugipa jabolrangkode rongtalatmanaha.
“Kamrangko da·o a·bachengtaiaha aro ia gital Assembly nokko bilsisani gisepon matchotna chinga ka·dongenga. Batanggimin somoirango a·sel ong·anirangko nikna man·ahani gimin anga da·o kamrangko sikkele ka·atna gita sikjaha. Uni gimin bilsisani gisepode kamrangko matchotna ka·dongenga,” ine Sangma aganaha.
Sangma-ni parakatani gitade, ia Assembly-ni gital protchongkoba rikpiltaina a·bachengaha aro ia protchongkode da·o cheng·kale tariskaengaha.
