U·IATTIMGIPAONI
SHILLONG: Meghalaya a·dokni Khasi aro Garo ku·sikrangkoba Constitution-ni Eighth Schedule-o napatchina dabienggipani bidingo Khasi Authors’ Society, national seminar-ko a·songni skotong New Delhi songjinmao ong·atna tik ka·angaha.
“Khasi aro Garo ku·sikrangko Eighth Schedule-o napatchina didina gita Meghalaya Assembly-o resolution-ko ra·ani da·o bilsi bonga ong·ahaoba chingni dabianide bilsi 40 ong·pilengahani gimin chingni dabianiko bilakbatatna gita chinga re·baenggipa September 29 aro 30 tarikrango Khasi ku·sik aro daka rikani bidingo national seminar-ko New Delhi-o ong·atanggen,” ine KAS-ni president Dr L Nonglait parakataha.
Dr Nonglait-ni parakatani gitade, ia national seminar-o a·song gimiko donggipa university-rang aro dingtang dingtang institute-rangoni Khasi skigiparang bakko ra·angenba, Khasi ku·sik aro sea jotaniko namdapatani bidingo agan-ku·pattianirangko on·anggen aro Khasi ku·sikko Eighth Schedule-o napatchina dabianikoba bilakbatatgen.
“Anga bebera·a ia national seminar-ko ma·mong sorkari aro media-rangba gisik on·gen, jedakode chingni dabianirang chu·sokgipa ong·gen,” ine Dr Nonglait aganaha.
Assembly-o resolution-ko pass ka·atna gita maikai manderang jingjengatanirangko dakna nangachim, uarangni gimin janapatengon, a·songni skotong songjinmaoba apsan daken jingjengatanirangko dakgenchimode ma·mong sorkari knachaknaba gnang ine KAS-ni president parakataha.
Da·ona kingking maini gimin Khasi aro Garo ku·sikrangko Eighth Schedule-o napatkujaenga ine sing·anina aganchakaniko on·angskaengon, “Da·o dipet iani bidingo ma·mong sorkari chingna maming talatanirangko on·a dongkuja. Home Affairs Ministry-ni changsa chingna seatgipa chittio janapatani gitade, Khasi-ba a·songo donggipa ming 38 ku·sikrangoni mingsa ong·paenga aro ia dabianiko uamang niengkua,” ine Dr Nonglait parakataha.