U·IATTIMGIPAONI
BAGHMARA: Tangka paisarang dongjae Baghmara-ni Integrated Child Protection Scheme (ICPS)-ko chalaianio neng·nikanirangko man·na nangengani gimin Sukrobar salo, Niksamso Garo Community Organisation (NGCO)-ni membor-rang, bi·sarangna cha·ani aro ma·manti bosturangko on·gilangaha.
Ia ICPS program-ara a·doko Social Welfare department-chi chalaienggipa ma·mong sorkarini scheme ong·achim indiba ia scheme-ko chalaianio tangka paisarangko man·sojaengani a·sel bi·sarangna nanga gita bosturangko aro cha·anirangko on·na man·jaengachim.
Indake ong·engon, iani bidingo koborko man·soani ja·man NGCO-ni membor-rang, ia program-ni ning·o dakchakako man·enggipa bi·sarangna cha·ani aro ma·manti bosturangko suale on·angaha ine NGCO parakataha.
“Ia ICPS program-ko chalaina gita Social Welfare department, batanggimin jabrimangna kingking tangka paisarangko man·sojaenga ine chingna u·iataha. Iani bidingo chinga man·a gita dakchakanirangko on·na miksonge da·al salni bako dingtangmancha bi·sarangna cha·ani aro ma·manti bosturangko suale on·angaha,” ine NGCO-ni president Arjun S Marak parakataha.
Ia program-ni ning·o dakchakako man·enggipa bi·sarangna nanga gita nirok sandianiko on·china gitaba NGCO Southern Zone, a·dok sorkariko mol·molataha.