U·IATTIMGIPAONI
TURA: Chokpot Area Vigilance Committee, GHADC, Tura-ni Forest and Environment-ni Executive Member Shri Ashahel D Shira-ko gronge, Chokpot Dareng chiringoniko niamgri rong·terangko bikote ra·engani gimin u·iataha. Dareng chiringoniko niamgri rong·terangko bikote ra·ani gimin jolni manderang aro sepangjolo donggiparang gimikan u·itoka. Iandakgipa niamgri kam ka·anirangko dontongna nanggen aro ia mamlako name dake nirokna nangenga, ong·jaode Chokpot-ni manderangni an·seng-baljokanio nangchakgen aro river ecosystem-na namjawa. Indake ong·engon Executive Membor A.D Shira-na Committee, chu·gimik obostarangni gimin aro niamgri ro·ongrangko bikote ra·aniara baditan Chokpot-ni manderangni janggi tanganio nangchakegen iarangni gimin agan-talate on·aha. Jolni manderang rong·te bikote ra·aniko raken jegalgenchimoba, uan bai bai ong·aienga. Jolni manderang Dareng chiringni chiko salantion ringna jakkala, quary-ni kamko dontongja ong·ode, ian mandeni an·seng-baljokanina namjawa.
Committee-ni memborrang Executive Membor Ahahel D Shira baksa adita ru·ute somoina agangrikangaha, indake A.D Shira, ia mamlako nirokatgen, sorkari an·chingna six Schudule-ko on·aha, ia schedule-o pangchake ua a·a, Council-ni ning·on ga·aka ine agane ja·ku de·na ka·dongataha. Vigilance Committee, A.D Shira-ni ka·dongatanina kusi ong·ako parakaha.
Uandake Vigilance Committee, CEM aro Deputy CEM- uamangkoba gronge Chokpot Dareng chiringo niamgri rong·te bikote ra·ani gimin u·iataha. Uamangba ia mamlako nirokatna aganaha.
Iarangni gisepo daitoko jako ra·e kam ka·giparang ia mamlako nirokatjaode, Vigilance Committee, mikkangchi rakbate ja·ku de·angna aganaha.