U·IATTIMGIPAONI
TURA: Meghalaya a·dokni Rashtrya Madhyamik Shiksha Abhiyan (RMSA) skulrango skigiparangni dingtang dingtang nanganirangko chu·sokate on·china gita All Meghalaya RMSA Teachers Association (AMRTA) Garo Hills region, a·dokni Chief Minister Conrad K Sangma-na sedoataha.
Skanggipao AMRTA-GHR-ni dilgiparang, RMSA skulrango skigiparangni dormahako bariatchina Chief Minister-ko mol·molataha.
“Sorkarini dakchake on·enggipa skulrang baksa tosusagenchimode RMSA skulrango skigiparangni man·enggipa dormaharang namen komibata aro ia sal somoirango manderangni nangchongmotgipa bosturangni dam namen rakengahaon chingni bang·gija man·paenggipa dormaharangchide janggi tangani cholan dongjaengaha. Uni gimin RMSA skulrango skigiparangni namgnina aro uamangni nokdangrangna chanchie skigiparangni dormaharangko bariatchina mol·molenga,” ine AMRTA-ni dilgiparang parakataha.
RMSA skulrango skigiparang jabri jabongarangni ja·mansa dormaharangko man·rongengani giminba skigiparang suk ong·gijaniko parakataha aro RMSA skulrango skigiparangna dormahako somoi gita on·jringchina Chief Minister-ko didiataha.
RMSA skulrango skigiparang, dormaharangna agrede maming man·gnirang dongjaengani a·sel neng·nikanirangko chagrongna nangtokenga ineba AMRTA-GHR-ni dilgiparang parakataha aro RMSA skulrango skigiparangnaba dingtang dingtang man·gnirang, jekai medical allowance, gratuity, social security scheme, retire ong·ani ja·man man·gnirang aro uandakgiparangko on·china gita Chief Minister-ko mol·molataha.
