U·IATTIMGIPAONI
WILLIAMNAGAR: East Garo Hills a·jani headquarter Williamnagar-o donggipa Jawahar Navodaya Vidyalaya (JNV)-o class X-ni chatro saksako una dal·batgipa chatrorang, kragija dake ‘ragging’ ba kal·ake roani a·sel uko hospital-o donatna gita nangao ga·akaha.
College ba skulrango ‘ragging’ ka·ani ba kal·ake roaniko 2001 bilsion Supreme Court champengatmanahachim indiba da·alona kingkingan a·songni badiaba badiaba biaprango iandake chonbatgipa ba gital chatro chatrirangni kosako kragija dake kal·ake ba sasti on·e roanirangko nikna man·kuengachim.
Indake ong·engon, Williamnagar-ni JNV-o poraienggipa chatro saksako iandake dal·batgipa chatrorangni kragija dake sasti on·e roani a·sel uko hospital-o donatna nangpilahani gimin bang·a manderangan suk ong·gijaniko parakataha aro ia chatrorangni kosako rakgipa sastirangko on·china didiattokaha.
Koborko on·ani gitade, ia chatroko nambate sanna gita Sonibar attamo Tura Civil Hospital-ona ra·baaha indiba da·o uni obostarang namkalaha.
Kobor on·timgiparangni u·iatani gitade, ia a·sel ong·ani re·anggipa September-ni 1 tariko ong·aha aro ua somoio ia chatroko Class XI-o poraienggipa chatrorang okamatenba, uko sasti on·an baksana jinma chadrape dokaha.
Ja·mano ia chatro, ia a·selni bidingo JNV-ni official-rangna aganeaha aro uko sanna gita Williamnagar Civil Hospital-ona ra·angaha.
Ia a·selni bidingo ia chatroni ma·a paaba, police-rangna badi ka·doangskaaha.
“Ia a·sel ong·anio jak donggipa chatrorang pilakan bilsi sokkugijagipa chadamberangsa ong·a aro uamang Juvenile system-o pangchakesa bichal ka·gen. Iani bidingo police-rangba sandirokanirangko dakenga aro bakan report-ko on·gen. Ia chatroko sasti on·e rogipa chatrorang pilakkon niamo pangchake mokordoma ka·gen,” ine East Garo Hills a·jani SP Siddharth Ambedkar parakataha.