U·IATTIMGIPAONI
TURA: Adita salrangna skang, West Garo Hills a·jani Garobadha police station-ni ning·o donggipa Haripur songo, Hema Malini Koch minggipa me·chikma saksa, an·tangni demechikko sko sotani ja·man, uni manggisiko nok sambaon gope galaha.
Iani bidingo police-rang, ia bilsi 36 ong·gipa me·chikmako Sonibar salo rim·aha aro da·o uko judicial custody-o donataha ine kobor on·aha.
Police-rangni u·iatani gitade, ia me·chikma, an·tangni bilsi 7 ong·gipa demechikko, unbaksa noko saksan ong·engmiting somoio so·otaha. An·tangni demechikko sko sotani ja·man ua bakan an·tangni nok janggilchipak, a·kol cho·enba, uni manggisiko gope galaha.
Ia a·sel ong·ani re·anggipa September-ni 1 tarik Sukrobar salo ong·aha aro ua somoio ia me·chikmani segipa na·tok rim·na re·angahachim aro uni depanteba, ua somoio uamangni ma·drangchi re·angahachim ine kobor on·aha.
Na·tok rim·e re·bapilon, ia me·chikmani segipa an·tangni demechikko noko nikejahaoba skulchi re·angakon ine chanchie dongaiengachim indiba ja·mano ua nokni janggilchipak re·angon, ua biapo gopram cho·ako nikeaha aro ja·mano gopramko cho·e nion uano demechiktangni manggisiko nikaha.
Iani bidingo bakan police-rangna kobor on·ataha aro ja·mano police-rang ua biapona re·ange me·chik bi·sani manggisiko ra·ongkataha.
Indake ong·engon, da·o dipet ia me·chikma maini gimin an·tangni demechikgipako sko sote so·otahachim police-rangna parakkujaenga ine West Garo Hills a·jani SP Abraham T Sangma parakataha.
“Chinga ia a·selni bidingo kakketko ma·sina gita uo sing·sandiengkua indiba ua mamingkoba agankujaenga,” ine Sangma parakataha.
