U·IATTIMGIPAONI
TURA: West Garo Hills-ni ning·ogipa Dadengreni MTET pass ka·gimin candidate-rang, uamangni Sub-Division-ni ning·o teacher-rangko rakkina gita advertisemnet-rangko on·anio jaroatengani gimin authority-rangni kosako suk ong·gijaniko parakaha.
MTET Passed Association-ni bimango apsan ong·gipa candidate-rangni janapatani gitade, Baghmara, Tura, Ampati, Jaintia Hills, Khasi Hills ugita gipin gipin biaprangode recruitment-ni skanggipa phase-de matchotangpilaha aro gnigipa phase-na tarisopilengaha, jeon Dadenggreode skanggipa phase-ni recruitment-nan advertisement-ko on·kujaengachim.
Dadenggreo skanggipa phase-nan advertisement-ko on·kujaengani gimin gipin Sub Division-rangona re·ange kamna gale nina am·achim indiba dingtang Division-onisa re·baa inenba uamangna on·jachim ine MTET pass ka·gimin candidate-rang aganaha.
“Mitampak biaprangode skanggipa batch-na mande ra·ani 2020 bilsion matchotangpilaha. Indake ong·genchimoba, Dadenggreode skanggipa aro gnigipa batch-nirang pilakn senge dongna nangengkua,” association aganaha.
Recruitment-ko dakanio Dadenggre-ni MTET pass ka·gimin candidate-rangko watchanggalaniara, namen kakketgijagipa kam ong·a ine agane, recruitment-ko ta·rakatchi gita ja·ku de·china gitaba Association, authority-rangko didiaha.
