U·IATTIMGIPAONI
AMPATI: Meghalaya High Court-ni ge·etaniko man·e, South West Garo Hills a·jaoba be·en bitinrangko ramasamrango manderangna mesoke palaniko champengatahani gimin Budbar salo, South West Garo Hills a·jani Deputy Commissioner RP Marak, market committee-rang baksa tom·aniko ong·atenba, ia niamrangni gimin talate on·angaha.
Ia tom·anio ADC (Judicial) YW Momin, BDO-rang, District Veterinary Officer AM Momin aro a·jani dingtang dingtang officer-rangba dongpae bak ra·angaha.
Ia tom·anio, SWGH a·jani DC RP Marak, Meghalaya High Court-ni on·gimin ge·etaniko jinmana talate on·angengon, be·en bitinrangko ramarango manderangna mesoke palaniara nina nitogija ong·an baksana rongtal an·talgijanikoba ong·ata aro HC-ni on·gimin ge·etaniko manijagenchimode kacharini gita sastirangko chagrongna nanggen ine mikrakataniko on·angaha.
South West Garo Hills a·jani dingtang dingtang biaprango be·en bitin palanirangko name nirokchina aro iandake skatang manderangni nikrangrao palna on·jachina gitaba ua market committee-rangko didiangaha.
Ia tom·anio ADC (Judicial) YW Momin-ba jinmana talalataniko on·angengon, iani bidingo jagnina skangan market committee-rangna u·iatanirangko on·manahachim ine parakataha.
South West Garo Hills a·jao be·en bitinrangko ramasamrango palna man·jana gita Animal Husbandry & Veterinary official-rangba, be·en palgipa biaprangko nirokangaha ine kobor on·aha.
