U·IATTIMGIPAONI
TURA: Dadenggre sub-division-ni ning·o bijoli on·aniko nirokenggipa FEDCO, bijoli on·aniko name nirok sandina gisik nangjaengani gimin obostarang namkalkujaskal, Phulbari-o donggipa FEDCO-ni office-rangko FKJGP Chibinang circle, September-ni 10 tarik dipet chipe donatna tik ka·angaha.
FKJGP Chibinang circle-ni president Binoth Sangma-ni parakatani gitade, nokrango bijoliko 230 Volts-mangni gita nangengon, ia jolrango donggipa nokrang 120 volts-mangni gitasan man·engani a·sel bijoliko chu·onga gita man·jaenga manderang neng·nikanirangko man·rongengachim.
“Ia jolrango voltage chu·ongrongja baksana bijoliba channa ampilgija sirongenga. Bijoli sirongengani a·selan load shedding-kode chinga ma·sipiljaengaha,” ine FKJGP Chibinang circle-ni president parakataha.
Da·ororo ding·karini ding·aniko chaktokna nangengani gimin ia jolrango songdongenggipa manderangde bijoliko chu·onga gita man·jae chaktopilgija dongna nangtokenga ineba Sangma parakataha.
“Saobade ia obostako ma·sina nanggen aro iako FEDCO namatkujaskal chinga FEDCO office-rangko chipe jingjengatanggen,” ine FKJGP Chibinang circle-ni president parakataha.
Phulbari jolrangara, da·o a·dokni Power Minister ong·enggipa AT Mondal-ni constituency-an ong·achim aro uni constituency-on bijoli on·aniba namjabatskaengachim.
Indake ong·engon, Phulbari jolrango bijoliko chu·onga gita on·na man·jaengani gimin Chibinang Grid-ko kulina gita da·o kamrangko ka·enga indiba adita neng·nikanirangko dongkuenga ine adita salrangna skangsan a·dokni Power Minister AT Mondal parakataha.
