An·tangni manderangna mikkang nitea inako Mawrie jegala
U·IATTIMGIPAONI
SHILLONG: BJP-ni state president Ernest Mawrie aro gipin dilgiparang, an·tangtangni manderangnasa mikkang niterongbata ine matnangenba Budbar salo, BJP-ni ku·wattimgipa aro Mawsynram-ni gitcham MLA Himalaya M Shangpliang, BJP-oni ong·kataha.
An·tangni kam watani chittiko ua BJP-ni state president Ernest Mawrie-na on·ataha aro ia chittio Shangpliang-ni parakatani gitade, ua BJP-na kakket ong·e dangdike on·angkuna sikani donggenchimoba, state president-ni ning·ao BJP-ni dilgiparang, an·tangtangni manderangnasa mikkang niteanirang dongani gimin ua BJP-oni ong·katna draatako man·aha.
“Uni gimin anga Meghalaya a·doko BJP-ni primary membor ong·aoni, an·tangni skani gita da·alo ong·katenga,” ine ua parakataha.
BJP-o napanggipa gipin gitcham MLA-rang baksa uko BJP-ni spokesperson-na seokako man·ani ja·man ua BJP-ni pal, manderangni nanganirangko bang·en media-o janapahachim ineba Shangpliang parakataha.
An·tangni kam watani chittio Shangpliang-ni parakatani gitade, state reservation policy-ni bidingo dingtang dingtang political dolrangni seokako man·gipa membor ong·e ua BJP-ni pal bang·en kamrangkoba ka·ahachim.
Ia bilsini a·bachengachibara ong·atanggipa Meghalaya Assembly election-o chu·sokgipa ong·jahani gimin ua Meghalaya a·doko aro mongsongbate songadam nokadamrango BJP-ko dal·roroatani giminba changni chang state president-na u·iatahachim ineba Shangpliang parakataha.
Assembly election-ni somoio pilak nanga dakchakanirangko on·ahani gimin ua Assam-ni Chief Minister Himanta Biswa Sarma, Union Minority Affairs Minister John Barla, Meghalaya in-charge Rituraj Sinha aro gipin dilgiparangkoba mittelpilataha.
Indake ong·engon, BJP-ni dilgiparang aro mongsongbate state president Ernest Mawrie, an·tangtangni manderangnasa mikkang niterongbata ine HM Shangpliang-ni matnanganiko Mawrie jegalatskaaha.
Iandake Shangpliang-ni matnanganiko jegalatengon, Shangpliang an·tangsa an·tangni jong-adarangoniko Mawsynram Mondal-na seokchina gita BJP-ko mol·mole, an·tangni nokdangna mikkang niteaha ine BJP-ni state president parakataha.
