U·IATTIMGIPAONI
SHILLONG: BJP Meghalaya-ni ku·wattimgipa aro Mawsynram-ni gitcham MLA HM Shangpliang-ni ong·katanina BJP-ni dilgipa aro a·dokni Cabinet Minister Alexander Laloo Hek-ba BJP-ni state president Ernest Mawrie-ko matnangataha.
Hek-ni parakatani gitade, Mongolbar salon Shangpliang uko grongenba, ua BJP-ni state president Ernest Mawrie-ni kam ka·anio kusi ong·nikjahani gimin ua BJP-oni ong·katna tik ka·aha ine parakahachim.
“Iani bidingo ua an·tangni kam watani chittiomangba janapkuaha. Shangpliang-san ong·aija, Garo Hills-ni dilgiparangko man·chape a·dokni pilak BJP dilgiparangan da·o ong·enggipa president-ni ning·ode party dal·rorona man·jawa ine ma·sitokenga,” ine Hek, kobor ra·timgiparangna aganaha.
Mawrie-na dongimin somoide bon·ahachim ine talataniko on·angskaengon, dingtang dingtang a·dokrango election-rangko ong·atengani a·sel ma·mongo BJP-ni dilgiparang, iani bidingo mamingkoba dakna man·kujaenga ine Hek parakataha.
“Indiba da·o Shangpliang, BJP-oni ong·katahani gimin a·doko ong·enga obostarangko ma·mongni BJP dilgiparangba ma·sitokenggnok,” ine ua aganaha.
Shangpliang gita dakgipa dilgipani ong·kataniara BJP-na dal·bea gimaani ong·aha ineba a·dokni BJP minister parakataha.
