U·IATTIMGIPAONI
SHILLONG: Gitcham BJP dilgipa HM Shangpliang jean September 13 tariko NPP dolo napanggen ine rongtale parakataha jeon ua maming neng·nikani gri party napanggen aro MP seat-ko man·angna unbaksa maming agangrika dongkujaenga.
“Anga maming neng·nikani gri NPP dolo napenga. Anga NPP dolo napahaode party-ni high command jedakgipa dakna nanggni kam baksa on·a angni pakreo gatna anga taria,” ine Shangpliang una MP ticket-ko on·a ku·rachaka ong·ode ine sing·anina aganchakangaha.
“Anga party-ona maming neng·nikani gri napenga aro anga iako angni changa sapani kamrangko jakkalangna ango donggipa nambatgipako on·angna party-ni high command-ni u·i ma·siani aro bichalna pakwata aro uamangni gita jedakgipa kamko on·an baska NPP dolo dangdike on·angna anga an·tangko taria,” ine ua aganangaha.
“September 13 tariko angko party-o chanchapatna aro gipin nangarangko agangrikna u·iatani ja·man adita salrangna skang anga changsamangmang Chief Minister-ko uni noko da·o dipetde grongkuaienga aro iarangna agrede iani bidingo chinga maming agangrikaniko dakujaenga,” ine ua agandapagnaha.
NPP State Office-o September 13 tariko ua NPP dolo napgen aro una chakpagiparang aro Mawsynram-oni manderang Mawsynram-o September 12 tariko NPP dolo napanggen.
“Conrad Sangma-ni dilaniko anga nikaha. Chief Minister-ni ia bilsi 5 sorkari rikanio a·doko namen dingtanganiko ra·baa aro bang·en namroroaniko man·aha aro an·ching bang·bate nikangkugen aro anga chanchia a·doko NPP party-mangmangsan a·dokni manderangna chelchakani, namroroani aro a·dokni manderangna mikkangchina namgniko ra·bana man·gipa ong·anggen,” ine ua aganangaha.
Kragipa aro nambatgipa chol gadangni politics-ni gita uni napna am·enggipa party ma·sichakangna ka·dongsoengani gimin aganangaha. Ua NPP dolo maming neng·nikani gri napangenga aro jeon manderangna dangdike on·angna namgipa chol ong·anio ua manderangna dangdike on·a nangnikenga, ine ua aganangaha.
Party-rangko dingtangani uni itihas-o vote on·giparangna chanchiangani gimin ua aganangaha, jedakgipa chanchianiko ra·na skang voter-rang unbaksa ong·a aro ua pangnan dilgiparangko watkalja.
Mawsynram-oni uni party-ni pilak worker-rang aro dilgiparang uni NPP-o napanganina uamangni namnikaniko on·angaha ine ua u·iataha.
“Kam watani bidingo anga Mawsynram-ni angni pilak dilgiparangko grongaha aro anga uamangnni namnikaniko ra·aha jeon chinga BJP doloni ong·katna chanchiaha aro anga angni ong·katani gimin aganangaha aro uamang uamangni namnikaniko mesokangaha aro angni manderang ang baksa donga,” ine ua aganangaha.
Mawrie baksa Lok Sabha election-ni bidingo ua maming dakeba agangrika dongkuja aro ticket-na ba ramram candidate-o donangani bidingoba agangrikna ua maming sing·a dongja, ine Shangplaing rongtale agan-talatangaha.
MP candidate-na uko nominate ka·na uni maming ma·si gri uamangni gisepo state BJP agangrika ong·ode ian dingtang katta ong·a aro iani bidingo ua mamingkoba aganani dongjawa, ine ua aganaha.