U·IATTIMGIPAONI
SHILLONG: BJP-chi dilenggipa NDA sorkarini de·e ra·bagipa ‘‘one nation, one election’’-ko Congress aro HSPSP jegalaha.
Ia ja·ku de·ani chonchongipa party-rangna namen namgijani ba neng·nikani ong·batgen ine MPCC general secretary, Manuel Badwar aganaha.
Ia neng·nikani ta·rakede ong·janaba donga indiba bilsi 10-15 bilsirango ma·mal ekani, namgija dingtang bimang ong·baskaani sokbagen, ua aganaha.
Ia de·e ra·baaniko ra·gatode a·jolni party-rang ru·uta bilsirangna tang·rikrikna man·jawa aro mangmang dal·dalgipa a·songni party-rangsan tangbangaigen, ua aganaha.
“Chinga democracy-ni orto-ko gimatnasiengaha indaken da·o a·songo ong·angengaha,” Badwar aganaha.
United States-o gita a·song ka·sinsin President-chi rikgipa bimangni sorkariona sokanggen jeon saksachi supreme dilgipa ong·enga jean a·songko dilgen, MPCC general secretary aganaha.
“Anga chanchia ia parliamentary democracy-ni gita a·songko rikani ba sason ka·ani bimangko chinga ripingna nangaI,” ua agandapaha.
Ua bill-ko parakatna ma·mong sorkariko chinga sengenga, HSPDP president, KP Pangniang aganaha.
“Jean manderangni gisikko saatani ong·enga ua kamrangkosa BJP-chi dilenggipa NDA sorkari ma·mongo dakna jotton ka·enga uni gimin chinga da·o chanchienga. Mikkangchi uamang ‘one nation, one religion’ ba a·song ge·san torom mingsan dakanikoba ra·gatnaba donga,” Pangniang aganaha.
Sorkari ma·mongo ‘‘one nation, one election’’ dakna chanchiako ra·gatna skangba pilak a·dokrangni chanchianirangko ra·na nanga” ua aganaha.
“A·songni da·o tarigimin democratic-ko golmal ka·na sikja,” HSPDP president aganaha.
