U·IATTIMGIPAONI
Shillong: Umiam dollongna nanggipa bosturangko bodolna de·e ra·bagimin gita bodol nanggiparangko MeECL bodolanggen ine Power Minister, Abu Taher Mondal mijalo u·iataha.
Mondal kobor ra·timgiparangna aganao, bodolna ba on·chotna nanggipa bearring-rangko gital bodolna, on·chotna de·e ra·baani gitan kam ka·na skang sorkari, IIT Guwahati-oniko report-ko sengkuenga ine aganaha.
“Preliminary report-rangni gita, Umiam Bridge namenga indiba dolongni bearingko bodolna nangenga,” Power Minister aganaha.
Indake ong·engon, ia de·e ra·bagimin reportna nangrimgipa technical committee-o MeECL aro PWD dolgnini engineer-rang donga, ua u·iataha.
Joint technical committee uamangni namedake chanchiani ja·mano una report-ko on·gen, ua aganaha.
‘‘Nangnikode iani bidingo Cabinet-ona anga ra·anggen,” Mondal aganaha.
Jensomaio gital bearing-rangko bodolgen ba dingtanggen unomitingo Umiam dolongko dondipatgen ua dondipatani sal ba tarikrangko manderangna u·iatgen, ua aganaha.
Kam ka·mitingo garirangko watjawaha, watgenoba batbegipa konta chetsan wataigen Power Minister aganaha.
“Aroba gitalgipa bearing-rangko tekmanahaoba ua dolongko skango gita dal·dalgipa garirangko watjawaha mangmang chonchongipa garirangko watgen. Ia somaimitingo dal·dal gariko re·na man·jawa,” Mondal aganaha.
Jedakode joint technical committee uko nina aro minggipin kamko ka·na chanchina man·gen man·a dipet ta·raken report-ko on·china ua IIT Guwahati-ko mol·molaha.
Umiam dolongni naljokani gimin bang·en sing·anirang aro jera ra·anirang dongaha. Dolongni naljokgipa ong·anina sal donako badeangaha jekon 1965 bilsio rikaha.
