U·IATTIMGIPAONI
SHILLONG: Assam-Meghalaya sima arirango nanggrikanirangna aro Assam police-ni bil-jakko mesoke Meghalayani a·arangko a·kange ra·enggipa kamrangko gisiko nange nirokatchina gita Opposition TMC, A·dok Sorkariko didiaha.
“Chinga re·anggipa Assembly session-oba ia mamlarangko janapaha. Jeje biaprangon sima arini bidingo meligrikna man·jaengachim, uani bidingosan sorkari agangrikaniarangko dakaia, gipin biaprangni bidingode mamingkoba dakja,” TMC vice president George B Lyngdoh aganaha.
Uni aganani gitade, je biaprangon sima arini bidingo maming kajia golmal dongjachim, uandakgipa biaprangoba Meghalayani a·arangko Assam seke ra·enga aroba nokrik-nokdakanirangko nikenga ineba TMC parakaha.
Khanaparao Meghalaya-ni a·ao Assamni transit camp rikgipan Assamni a·a ra·sekani sakki ong·a, unaskangde transit camp-ara Meghalaya-ni a·ao ong·achim, da·o skanggipa phase-o sima ari tik ka·gipaode Assam Meghalaya-ni sima arian, transit camp-ni ki·sangchisa ong·skajok, ua aganaha.
“Kajia golmal donggipa sima arini list-o biming donggijagipa biaprangoba Assam, Meghalaya-ni a·arangko ra·seke ra·enga,” Lyngdoh aganaha.
