Mawrie-ni kosako Shangpliang-ni matnangani sakki gri: BJP
U·IATTIMGIPAONI
SHILLONG: Political party-rangode, ‘Aaya Ram Gaya Ram’ kattade ramram ong·pilaia ine Cabinet Minister aro BJP MLA AL Hek aganaha.
HM Shangpliang-ni BJP-oni ong·katangani biding·o sing·anina Hek ia kattarangko aganaha.
“Political party-ode pangna Aaya Ram Gaya Ram’ miksongani, re·baa aro ong·katanga dakade dongaia indiba angade ianon aro ianon ong·aigen,” Hek aganaha.
Legislator-rangni dolsa dolgipinona katruraani gimin ia ‘Aaya Ram Gaya Ram’ katta skang 1967 bilsio Haryana MLA Gaya Lai-oni a·bachengaha.
Ua, antignini gisepon changgittamna uni party-ko jitruraaha, skanggipao Congress-oni United Front-ona, unoni Congress-ona re·bapilatie kontaskuni gisepon United Front-ona katangtaipilaha.
Ian ja·manode mingsa political joke ba ka·dingani golpo ong·aha aro ian Indian politics-o political party-rangni gisepo kim·kimgijaniko ra·baaha.
Mikkang nitee kam ka·a ingipa kattani bidingo, da·omitingo Shangpliang aro BJP-ni gisepo namen ding·chaogrikenga.
Unomitingo, A·dok BJP president Ernest Mawrie-ni kosako, gitcham Legislator H.M Shangpliang-ni matanganirang maming sakki dongja, tol·anian gachipa. Shangpliang, uni bilsi dokna political-ni a·bao dongon party bodolaan dolbri ong·pilengjok. Ching baksa jasku aro gimikchi bilsi dokna political a·bao dongoba an·tangni kamrangkon ma·sija, aro mandeni changa sapani kri maidakgipa daitorangko on·a ukoba u·ija ine Kisan Morcha President, BJP, Meghalaya Pradesh, Justice Syiem matnange aganaha.
BJP president Mawrie-ni kosako, mikkang nitee kamrangko ka·a ine Shangpliang-ni matnanggipa kakket ong·srangja, ua agandapaha.
Una Political appointment on·gipaba an·tangko mesoke on·asan ong·aia. Uni gipin Political Party-o napanide uni Political a·bao man·gnisan ong·aia, party-ni uandake manderangni namgnina ong·ja, Syiem aganaha.
Party-o sak 100-na baten gamchatgipa aro an·tangtangko on·kange kam ka·giparang donga, jemangan boksisrangko man·na krapila, boksisrangko on·ani gimin party-san chanchina bil dongaia, Shangpliang-de re·anggipa November jaosan party-o napea, indakoba Election-o chu·gimik dakchakaniko man·achim, indiba rasong grie chu·sokjaha. Ua party-ni deology-ko ja·rikode, ua party-ni una daito on·aniko senggenchim, Kisan Morcha dilgipa aganaha.
Election-ni ja·man, batanggimin bang·gija jarangna skango, jensomoion State Kisan Morcha, uni State Executive-rangko jujatokachim, ua somoio anga an·tang manchaan, a·doko Kisan Morcha-na daito ra·nagipako biming minge on·china aroba Mawsynram-o Kisan Morcha Mandal-ko songna gita Shangpliang-ko baditaba changna aganahachim indiba sorkarini kamrang bang·enga, jakchakjaenga ja·mano gronggen ine pa·sike bon·aha, indake uni jaskuna ching baksa bakrimanio Shangpliang, BJP-na maming namgnikoba dakjaha ine Kisan Morcha President, BJP, Meghalaya Pradesh, Justice Syiem aganaha.