U·IATTIMGIPAONI
SHILLONG: Meghalaya a·doko lekka porani cholrangko nambatatna gita a·dok sorkari, chatro chatrirangna namgni ong·gipa niamrangkosa ra·gate on·aha ine Budbar salo, a·dokni Chief Minister Conrad K Sangma parakataha.
Shillong songjinmao donggipa Laban Bengalee Boys Higher Secondary School-ni bilsi 100 gapaniko manianio dongpae bakko ra·angengmiting somoio ia kattarangko Chief Minister aganaha.
A·doko lekka porako nambate on·na man·na gita sorkari, chatro chatrirangna nangani krisa niamrangko tarienga ineba Chief Minister parakataha.
Batanggimin bilsi 50-ni gisepo, lekka porani kamrango chatro chatrirangna nangchongmotgipa kamrangkon nichanggalahachim ine janapatengon, lekka porani kamrangko ka·engon, chatro chatrirangna maia nambatgipa ong·gen, ukosa nie ja·ku de·na nanga ine Chief Minister aganaha.
“Batanggimin bilsi bonga-dokni gisepo education department-o dingtanganiko nikna man·aha. Skangode lekka porana miksonge sorkarini chamatgipa tangka paisarangkon jakkalsretaha indiba da·ode sorkari skulrangoba nokrangko aro chatro chatrirangni nanganirangko namdapatchina sorkari dingtangmancha ge·etaniko on·aha,” ine Sangma aganaha.
Lekka porani kamrangna chimonggipa tangka paisarangko 2019 bilsiona kingkingan jakkalchipjaha indiba lekka porani kamrango kajina dake ra·gipa tangka paisarangko ia sorkari, skul nokrangko rikna jakkalskaaha aro a·dok gimikon sorkari skulrangna namgniko ra·baaha ine Chief Minister parakataha.
Ia skulo namgipa lekka porako on·engani gimin Laban Bengalee Boys HS School-ko kulidilgipa manderangko mittelpilangengon, Laban Bengalee Boys HS School-ni bilsi 100 gapaniko manianian ia skulni chu·sokgipa ong·aniko maniani gitaba ong·enga ine Sangma parakataha.
Ia skulo poraienggipa chatrorangkoba pangnan somoiko ja·rikgiparang aro namgipa gunrangko ja·rikgiparang ong·china gita Chief Minister ku·pattiangaha.
Ia tom·anio a·dokni Education Minister Rakkam A Sangma-ba dongpae bakko ra·angaha.
