Manderangna an·seng baljokaniko on·na man·jaode sorkarini kamrang indin ong·aigen: Conrad
U·IATTIMGIPAONI
SHILLONG: Budbar salo, Ayushman Bhava campaign-ko India a·songni President Draupadi Murmu, a·song gimikna a·bachengate on·angaha aro ia campaign-ko a·bachengatanio, a·dokni Chief Minister Conrad K Sangma, Health Minister Ampareen Lyngdoh aro Health department-ni official-rangba State Convention Centre-o bakko ra·angtokaha.
State Convention Centre-o a·dokni Chief Minister, tom·anio bak ra·giparangna aganprakangengon, songadam nokadamrango donggipa manderangna nangchongmotgipa an·seng baljokanirangkon sorkari on·na man·genchimode, namroro silroroani kamrangko ra·baani maming namgni dongjawa ine parakataha.
An·seng baljokaniko on·aniara sorkarini daitomangmangsan ong·aija indiba an·seng baljokanide nokdangonin a·bachenga ineba ua aganaha.
“An·seng baljokanide an·chingni nokdango, songo noko aro joltangtango maikai an·ching rongtal an·tale dongna ranta ka·a, unoba pangchaka. Uni gimin an·chingni a·doko songdongenggipa mande sakantian an·seng baljokgiparang ong·na man·na gita an·ching songsalni mande sakantian, dingtang dingtang daitorang donga,” ine Chief Minister aganaha.
A·doko songdongenggipa manderangni bakrimani gride maming programan chu·sokgipa ong·na man·jawa ineba Sangma aganaha.
Ia tom·anio dingtang dingtang Village Health Council (VHC)-rangni chu·sokgipa ong·ani bidingo agananirangko knae ua namen kusi ong·a ineba Chief Minister parakataha.
VHC-rangni kamrango dakchakanirangko on·na gita rakbee kam ka·enggipa VHC ge·antinan gong 20,000 tangkarangko dakchake on·anggen ineba ia tom·anio Chief Minister parakataha.
Ia tom·anio a·dokni Chief Minister, Village Health Council-IEC Book aro Register-ko oprake on·angan baksana VHC App-koba a·bachengate on·angaha aro VHC/TB/MHIS program-rango nambate kamrangko ka·gipa aro kamrangko chu·sokatgiparangna dingtangmancha boksisrangkoba suale on·angjolaha.
Ia Ayushman Bhava campaign-ko a·bachengatanio ASHA-rang, health worker-rang aro a·dok gimikni VHC membor-rangba dongpae bakko ra·angtokaha.
